Namangka sa duha ka sapa

Lisod kaayo buhaton ang pagpadagan og usa ka bangka sa duha ka sapa. Pero, sayon-sayon kaayo kining gihimo nilang senatorial candidates Chiz Escudero, Loren Legarda ug Grace Llamanzares Poe.

Tingale, nagtuo silang tulo nga makatabang og dako alang sa ilang kadaogan sa 2013 nga eleksiyon ang pagka-common candidate sa Liberal party ug sa United Nationalist Alliance (UNA).

Karon nga gipadesisyon sa lider sa UNA nga si Bise Presidente Jejomar Binay silang Escudero, Legarda ug Llamanzares Poe asa gyud sila, asa kaha ang ilang pilion – ang Liberal o ang UNA.

Si Escudero parehong giutangan og buot ni Presidente Noynoy Aquino ug Binay. Kun nakahinumdom kamo, siyay nagpasiugda sa “NoyBi” political ad nga giingon nakapatikyaob kang Mar Roxas sa pagka-bise presidente, kay ang iyang presidente si Noynoy ug ang iyang bise presidente mao si Binay. Mao nga NoyBi.

Apan daw wala na moila og utang kabubut-on si Binay. Iya na gyung gipadesisyon si Escudero.

Si Loren dili na  ikahibulong kun sa UNA ug Liberal siya magyampungad. Daan na siyang giila nga “political butterfly” kay bisan asa lang siya motugpa, depende og asa siya makapabor.

Apan ang labing makaluluoy unya sa tulo mao si Llamanzares Poe tungod kay sige kining nangiwit sa survey, dili sama nilang Escudero ug Legarda nga nag-una sa survey.

Pananglit itagak siya sa UNA, makapadaog kaha kang Llamanzares Poe ang Liberal?

Nasayod naman kita nga si Llamanzares Poe walay ikapanghambog sa mga botante nganong angayan siyang pili-on, gawas sa iyang pagka-anak ni anhing Fernando Poe Jr. nga mikandidato apan napilde pagka-presidente. Ang iyang pagka-anak ni FPJ dili igo nga kuwalipikasyon sa pagka-senador.

Nagparehas lang kini silang Nancy Binay nga anak ni Jejomar Binay. Kini si Nancy Binay sa dihang gi-interview sa usa sa mga programa sa TV miangkon gyud nga wala siyay kasinatian sa politika ug padagan sa gobyerno kay dili man siya opisyal sa kagamhanan.

Ang iyang gipanghambog, sama kang Llamanzares Poe, mao ang pagka-anak og politiko.

Apan kun modaog si Nancy Binay, mao kini mahimong ehemplo sa buhi nga political dynasty sa Pilipinas. Asa man ka ana, bise presidente iyang amahan, unya siya senador?