Ikiha ko nimo?

Nahimong komedya namo sa mga reporter sa City Hall ang pag-ingon “Ah BOPK g’yud ka!” kun dunay usa kanamo, labi na g’yud ko, nga mohimo’g pangutana nga maapiki ang Team Rama.

Dunay usa ka division head sa City Hall nga sa tanto namo nga komedyahay, gipikpik ang akong abaga ug miingon nga dili kuno siya makamahay niadtong mosuporta sa BOPK.

Apan mitingkag ang akong dunggan dihang mikomedya ang division head nga dili kuno siya makamahay kay kun ang usa ka tawo asa “mabuhi ug malipay,” adto g’yud mosuporta.

Ang tinuoray nga reporter mangutana g’yud sa mga news sources aron masabtan niya ang matuod nga isyu aron nga ikapasabot niya kini sa publiko. Mao kana ang akong gihimo sa matag press conference ug hinungdan nga usahay, madudahan ko nga “BOPK” samtang usahay ‘sab madudahan nga “Team Rama.”

Pasayloon lang nako ang maong division head kay wala man gud siya masayud nga kagahapon pa gani ko makabalik pagtambong og press conference ni Kongresista Tomas Osmeña.

Isip City Hall-assigned reporter sa The Freeman ug DYLA, mangutana g’yud ko sa mayor. Ug isip beterano na sa industriya, wala ko’y lipud-lipud sa pagpangutana.

Kitang tanan dunay mga kaugalingon nato nga baruganan kun kinsa sa mga kandidato ang atong dapigan atul sa adlaw sa eleksyon.

Alang sa maong mga opisyal sa City Hall nga madudahon, ako kamong ingnon nga walay bisan usa kanila ni Mayor Michael Rama ug Kongresista Tomas Osmeña nga nakahatag kanako bisan usa ka sentimo aron paboran ang ilang kandidatura.

Kun dunay isyu nga matan-aw nako nga husto, akong daygon ug sawayon usab kun sa akong pagtimbang-timbang dili kini maayo.

Mao kana ang katungdanan sa usa ka maglilindog, apan isip news reporter, kuhaan g’yud nako og reaksyon ang hingtungdan sama sa gihimo nako kanunay ni Konsehal Bebot Abellanosa.

* * *

Si Abellanosa kanunay’ng giatake sa iyang kaatbang sa politika nga si Atty. Aristotle “Totol” Batuhan ingon man sa mga tawo nga wala makagusto sa iyang kalihukan.

Sa akong balita, kanunay g’yud nako nga gikuhaan og reaksyon sila si Bebot ug Totol. Karong uwahi, gibalita nako ang kabahin sa suwat nga gipadala sa nagpaila nga Cebu Educators Forum (CEF) convenors.

Mikwestyon kini sa pagka-avail og daghang Cebu City scholars sa Asian College of Technology (ACT) nga gipanag-iya ni Abellanosa.

Mipasangil usab ang CEF nga kuno si Konsehal Abellanosa miawhag sa iyang mga magtutudlo nga papasahon lang bisan kadtong mga tinun-an nga ubos og grado.

Nasayud ko nga dili kini maayo alang kang Abellanosa mao nga ako g’yud nga gipaninguha nga kuhaan siya og reaksyon. Apan ang konsehal nasuko gihapon ug mihulga nga mokiha.

Pastilan, unsa gud tawon ka nga klaseha sa pagkatawo konsehal nga ikasuko man nimo ang pagkapatik sa balita nga duna ka may reaksyon?

Angay ka nga masuko kun gipatik ang balita nga wala ka kuhai sa imong baruganan. Apan ayaw’g sabta nga pugngan ko ikaw nga mopasaka og kaso batok kanamo. Kun unsay anaa sa imong huna-huna, padayona kay andam kami nga motubag sa imong kaso. Ayaw pagtoo konsehal nga abi kay opisyal ka sa dakbayan dili na libre ang media nga mobalita sa mga isyu nga maglambigit kanimo.

Ang tinuod, patas ang akong pagtagad nila ni Totol ug Bebot. Pulos nako sila mga higala apan karon nakabantay ko nga dili diay maayo nga higala kini si Abellanosa.