Daang Matuwid vs. Daang Maganda

Giawhag ni Kong. Tomas Osmeña nga imbestigahon sa Commission on Elections (Comelec) ang pagamit sa Cebu City hall sa sakyanan sa gobiyerno alang sa pagpundar sa entablado ug paghakot sa mga Team Rama supporter aron pagtambong sa United Nationalist Alliance (UNA) proclamation rally didto sa Plaza Independencia niadtong Martes.

Samtang iya kining giyawyaw ngadto sa media wala siya mopasaka og pormal nga reklamo ngadto sa Comelec.

Sumala pa ni Mayor Mike Rama nga wala nay laing gihimo ang Bando Osmeña - Pundok Kauswagan (BOPK) kun dili ang kanunay na lang nga pagreklamo ug pagpasaka’g kiha batok kaniya.

Nagtoo ang mayor nga buot gayud ni Osmeña ug sa iyang mga hinanib sa BOPK nga ma-disqualify siya sa pagpakig-atbang sa kongresista. Nakaingon si Rama nga mao kini ang batasan ug reaksiyon sa mga pildirong kandidato.

Kun tinood man kining pasangil ni Kong. Tom wala ba usab maghimo niini ang BOPK? Mas grabe man gani kadtong sumbong nga gigamit ni Osmeña, sa iyang igsoon ug pag-umangkon ang duha ka sakyanang hinatag sa tag-iya sa Big Foot. Dili ba usab tinood nga gigamit sa mga kandidato sa BOPK ang sakyanan nga gi-service ngadto kanila sa City Hall sa ilang gihimong pulong-pulong?

Nganong ato pa mang daginoton kini? Didto sa Estados Unidos (US) ang presidente libre kaayong mogamit sa presidential limousine, chopper ug ayroplanong Airforce One ug ubang mga sakyanan sa White House alang sa pagpangampanya. Wa may mireklamo niini.

Kining gihimo ni Kong. Tom mao ang gitawag nga "The pot calling the kettle black."

* * *

Tungod sa bawosbawos nga kinihaay sa kampo ni suspended governor Gwen Garcia ug ni acting governor Agnes Magpale nahinumdum lang hinoon ko sa hulga ni Kong. Pablo John Garcia batok kang Manlalaban Hilario Davide, Jr. nga iya kining ikiha kun ihinayon niini ang pagpasaka og reklamo kalabut sa pag-abuno sa parte sa Balili property nga tubigan. Napasaka naman ang kiha nila ni Davide, acting governor Agnes Magpale ug Bokal Arleigh Sitoy kalabut niining maong isyu nganong wala man lagi kiha nga gipasaka si PJ Garcia batok kang Davide? Kutob ra diay kadto sa hudlat?

* * *

Nakapaintriga kanako kining nahitabo sa usa ka tourist bus nga gihatag sa Kapitolyo ngadto sa lungsod sa Barili, Cebu.

Naabtan sa mga opisyal sa Kapitolyo ang tourist bus sa usa ka pribadong luna nga nahimutangan sa usa ka construction company didto sa Guibuwangan, Barili nga gitangtangan na og pipila ka ligid ug ubang mga parte niini.

Sumala ni Barili bise mayor Marlon Garcia nga gitangtang ang ligid ug ubang mga piyesa sa maong bus kay adunay giayo ang mekaniko sa ilawom sa maong sakyanan.

Mao ba? Dili ba brand new man kining maong sakyanan nga dili pa dugay gihatag ni karon suspended gobernador Garcia ngadto sa presidente sa Association of Barangay Council (ABC) inay sa mayor sa maong lungsod? Giunsa man diay kini pagamit nga dali man kaayong nadaut kining maong bus nga balor og kapin sa duha ka milyon ka pisos?

Kining maong sakyanan kabahin sa daghang mga tourist bus nga gihatag isip ganti ngadto sa mga munisipyo nga maayong nipatuman sa eGwen program sa Kapitolyo. Didto kini giturn-over sa ABC kay kontra man sa gobernador ang mayor sa maong lungsod. Inay sa balay lungsod didto kini giparking sa usa ka pribadong luna.

Gikiha ni Bise Mayor Garcia si Barili Mayor Teresito Mariñas, Provincial General Officer chief Eva Encabo, mga pulis ug si acting Gov. Agnes Magpale tungod sa wa kuno mananghid ngadto kanila sa pagsugo sa mga opisyal sa Kapitolyo ug sa mga pulis sa pagsulod sa gibutangan sa maong sakyanan nga usa ka pribadong lugar.

Sumala pa sa bise mayor nga wala kunoy labut si Magpale niining maong bus kay hinatag kini sa iyang igsoon ngadto sa ABC. Nagtoo tingali ang bise mayor nga ang iyang igsoon mao gihapon ang haring-gangis sa Kapitolyo. Maayong mahibaw-an ni Bise Mayor Garcia nga kining maong sakyanan gipanag-iya gihapon sa probinsiya. Ambot og nabayran na ba kini sa Kapitolyo? Kinahanglang ikiha ni Magpale ang mga responsabli sa pagtangtang sa ligid ug ubang mga piyesa sa maong tourist bus aron moguwa ang tinuod nga sad-an, kun duna man.

* * *

Daang Matuwid sa LP samtang Daang Maganda ang slogan sa UNA. Bisan tuod og wala gayud atakiha personal sa UNA si Pres. Aquino apan dili kapugngan nga aduna nay badlis nga nagpatunga tali sa duha ka mga grupo politikal. Nganong magpatoo pa man ang UNA nga dili sila oposisyon. Nahadlok ba sila sa popularidad ni PNoy o nahadlok ba ang ilang duha ka mga harihari (Bise Pres. Jejomar Binay ug Senate Pres. Juan Ponce Enrile) nga mangatangtang sa ilang mga pwesto sa Aquino administration? Alang kanako usa ka tinalawan kining gihimo nila ni Binay, Enrile ug kanhi presidente Erap Estrada nga kanunay magpatoo nga nagpaluyo kang PNoy.

Karon nga gihubuan na ni Pres. Aquino ang UNA senatorial candidates angayan lang nga molantad na sila sa tinood nilang kolor.Email:[email protected]