Cortes, Ouano ug Quisumbing magkarambola?

Sumala sa Chinese Zodiac, ang tuig 2013 mao ang tuig sa bitin kon year of the water snake, nga magsugod karong Pebrero 10, 2013 ug matapus sa Enero 30, 2014.

Ang bitin, nga gitawag usab og junior dragon, mao ang ikaunom sa Chinese Zodiac nga adunay 12 ka animal sign.  Kung Hei Fat Choi (May prosperity be with you)!

* * *

Tinuod ba nga walay salig sa usa’g-usa ang mga dagkong politiko sa siyudad sa Mandaue agig pangandam sa 2016 nga piniliay? Sumala sa akong duwende, nga usa ka kanhi konsehal sa siyudad nga karon usa na ka barangay kapitan, nga wa mosalig ang mga Cortes sa linihukan sa mga Ouano. Nagduda sila nga tingalig mobudhi kini sa Liberal Party nga pinanguluhan ni Mayor Jonas Cortes.

Wala man hinooy hulga sa kandidatura ni Mayor Jonas kay wa man siyay lig-ong kaatbang sa umaabot nga eleksiyon. Ang maniobra anha sa mga kandidato sa pagka-bokal ug pagka-kongresista. Samtang sigurong suportahan sa mga Cortes si reelectionist Arleigh Sitoy nagduda pa kuno sila kun ila bang dad-on si kanhi Mandaue City mayor nga karon bokal nga si Teddy Ouano nga magpapili pag-usab, sumala sa duwende. Nangandam na man gud karon sila si Mayor Jonas, Kong. Luigi Quisumbing ug ang mga Ouano alang sa 2016 nga eleksiyon.

Mao kini ang katapusang termino ni Mayor Jonas. Gusto sa mga Cortes nga ang mopuli sa pagka-mayor mao ang iyang asawa. Apan interesado usab ang mga Ouano sa pagkupot pagbalik sa maong pwesto. Naa usay huhungihong nga gusto usab sa usa ka sakop sa pamilyang Quisumbing (dili si Kong. Luigi) nga modagan pagka-mayor sa Mandaue City.

Ang posibleng lansaran ni Mayor Jonas mao ang pagka-representante sa ika-unom nga distrito nga gihuptan karon ni Kong. Quisumbing nga aduna pay laing termino sa dili pa mo-graduate pagka-kongresista.

Kun dili gayud matuman ang pagpikas sa Mandaue City ngadto sa Mandaue North ug Mandaue South magkabangga gayud sila si Mayor Jonas ug Kong. Luigi sa 2016 nga eleksiyon. Sumala sa akong duwende, nga tingalig si kanhi kongresista Nerissa Soon- Ruiz maoy suportahan sa mga Cortes. Abi nakog hapsay na ang relasyon sa mga dagkung lider sa politika sa Mandaue City, gubot pa man diay sa lukot.

* * *

Aniay akong unsolicited advice kang incumbent governor Agnes Magpale- pabilin diha sa imong kaugalingong opisina. Papangitaa na si acting vice governor Julian "Teban" Daan og laing buhatan. Human magnukosnukos pag-asumir sa pagka-acting bise gobernador magdalidali dayon siya og pangayog opisina?

Kun ipamugos nimo ang pagbalhin ngadto sa governor's office kuyaw nga motoo na ang katawhan nga maginukdanon ug hakog ka sa gahum sigun sa gipasangil sa kampo ni Garcia.

Nganong ganahan ka man mobalhin sa opisina ni suspended gobernador Gwen Garcia nga gubot pa man kaayo kana? Ipalungkab nimo ang gisiradong buhatan sa gobernador? Hapit na usab ang eleksiyon sa Mayo. Huwata na lang na kay kun modaug ka anha ka man gihapon sa buhatan nga imong giukopahan karon.

* * *

Bisan unsaon pagsaway ang desisyon sa Court of Appeals sa mga abogado ni suspended governor Gwen Garcia apan ang kamatuoran mao nga napakyas ang ilang mga argumento atubangan sa korte.

Bisag unsa ka maayo ang usa ka abogado apan dili siya maoy mohukom sa kaso kun dili ang korte. Unya nidesisyon na man ang hukmanan nganong magsigi man lang gihapon sila og panghambog nga husto sila? Gipun-an pa gayud ang kapildihan ni Gwen sa desisyon sa Ombudsman kalabut sa Balili property.

Hinugay na ana uy! Maypa og mangandam namo sa inyong mga argumento aron pagtuis sa merito sa suspension order sa presidente batok sa inyong kliyente.  Apan ang labing mahinungdanon karon mao ang pagpugong nga masilotan ang suspended governor sa kasong kriminal kalabut sa pagpalit sa luna sa mga Balili nga magdala og silot nga laing pagkasuspenso ug pagkapriso.

Naa pay naninguha nga silbihan sa suspended governor ang accessory penalty nga disqualification sa paghupot og public office, sa ato pa tangtangon siya sa listahan sa mga kandidato sa pagka-kongresista. Sigi mog pabilib nga maayong laki mong abogado unya kanunay man laging masupalpal sa korte ang inyong mga argumento?

In hindsight, nganong dili man tuod plunder ang kasong gipasaka batok sa mga tawong nalambigit sa pagpalit sa Balili property nga unta naglambigit man kini og kapin sa P50 milyones nga salapi sa Kapitolyo?

* * *

Akong pahalipay ngadto sa mga haligi sa bag-ong PR & Advertising Agency nga iFactor!

Email: [email protected]