EDITORYAL- Ang estudyante ug ang ilang sex video

Kini bayang pakighilawas di baya angay  nga yaga-yagaan, mahimong illegal ug legal   tungod  kay way si kinsa mang tawong normal nga di mosagop  ug  mobuhat sa maong  butang.

Sa bahin  sa illegal  nga sex  o  pakighilawas  sa di magtiayon,  ang  pagka-supak sa balaod  niini  di malalis, apan  tungod  ba  kay  gibuhat  sa di kasal  ang maong butang  angay  na nimong  ibandilyo  sa  tibuok kalibotan?

Ang illegal  di gyud mahimong  legal  sa akto  nga  gibuhat  kini  sa di lisensyadong  mga  binuhat  nga  babaye  ug  lalaki  nga  di  kasado  o kaha  managsama  og  sex  o  pagkatawo.

Apan  bisan  pa  kun  legal  o  buhat  sa magtiayon  nga  kasado  o lisensyado  labing  di kini angay  bugal-bugalan  kay  ang  pagbuhat  sa ingon mas labaw  pa ka  ngil-ad  sa mananap  kun buot  hunahunaon.

Kay ngano,  ang  mga mananap  nga  magpasundayag  sa ilang  pakighilawas bisan  asang  lugara  ug higayona magbugal-bugal  ba  sa ilang  isigkaingon?

Tinuod  nga wala  kita  masayud  sa ilang  hunahuna  apan, ang tinuod  kun gikinahanglan mang  pasilotan  ang  nagbuhat  og  illegal nga pakighilawas  ilabi  na  kun  ang  pagbuhat  sa maong  eskandalo  gipasundayag  na  sa publiko  nga  lugar  nga nahisama  na  sa mga  hayop,  aw  nganong  di  man  mahimo pinaagi  sa korte.

Aduna kita’y  husgado  nga angay  mopahamtang  og silot  sa angay  nga  silotan  nungka  nga  silotan  ang  makasasala  pinaagi  sa bugal-bugal.

Kay  ang  tawo  adunay  sagradong  kauwaw  ug  kun  imong  ibutang  ang  mga makasasala  sa imong  kaugalingon, di kaha  usab  nimo  bation  ang  hilabihang  kauwaw sama  sa gibati  sa hingtungdang  makasasala?

Ning silong  sa langit, walay  tawo  nga perpekto  gawas lamang  kang  Jesu Cristo  nga  wala  makabuhat  og sala  sukad  sa Iyang  pagkabata  ug hangtud  nga tua  na  siya  sa  langit.

Busa  sa  gihimo  niadtong  estudyante  ug  sa iyang  uyab  nga  gikuhaan  nila  og  video  tape  ang  ilang  pakighilawas, di ba diay kadto mahimo  ni bisan kinsang  nagkahinigugmaay, nagsinabtanay  ug  nagkauyonay?

Mahimo baya  kini  ni bisan  kinsang normal  nga tawo,  manag-uyab  ug  managtiayon  ug  di, apan  unsa may rason  kun  ang  ubang tawo nga  mohimo sa ingon ug  sa  wa dahoma  nga  masayran  sa uban, unya imong bugal-bugalan?

Kun silotanan sila nganong di man ipaagi  sa hukmanan? Kun  ikaw maoy  diha sa ilang  dapit di  ba diay  nimo bation  ang  gibati  usab  nilang  kauwaw?