Nahingpit na!
Nahingpit na ang pagpatuman sa unom ka buwan nga suspension ni Gobernador Gwen Garcia human wala na siya tugoti nga makabalik pa sa iyang buhatan.
Si acting Gov. Agnes Magpale mimando nga sirad-an ang buhatan ni Garcia sa miaging semana human kini nanaog ug miadto sa habagatan aron sa pagpangampanya.
Matud ni Magpale nga iyang nahukman nga kandadohan ang buhatan ni Garcia tungod kay dili na makiangayon sa mga Sugboanon nga himuon sa suspendidong gobernador ang iyang opisina nga daw iyang panimalay.Maisip na kini nga pagpahimulos sa resources sa gobyerno.
Bisan asa nga anggulo nimo tan-awon dili husto ang pagpuyo ni Garcia diha sa Kapitolyo.
Ang kampo sa suspendidong gobernador miinsister nga isip pinili sa katawhan duna siya’y katungod nga magbaton og opisina.
Matud nila nga igo lang siya nga gisuspenso ug wala tangtanga sa pwesto. Husto, igo lang siya nga gisuspenso ug busa duna pa siya’y katungod nga magbaton og opisina. Walay nakiglalis niini apan unya na human sa unom ka buwan niya nga suspension.
Asa man ka kita og suspendido nga padayong mireport sa opisina? Kun tugotan ta nga padayon siyang mag-opisina unsa may iyang buhaton sa Kapitolyo nga dili naman siya makahimo og transaksiyon sa ngalan sa probinsiya.
* * *
Human nabakante ang opisina ni Garcia giangkon ni Magpale nga andam na siya nga mobalhin didto sa maong buhatan.
Apan dali ni nga gisaway ni Garcia. Gani iyang gitawag si Magpale nga "big fat liar".
Kini tungod sa unang mga pamahayag niini nga wala siya mag-apas nga adto mag-opisina sa grandyoso nga buhatan ni Garcia.
Dili dautan nga mabalhin si Magpale og buhatan. Labaw na nga dili illegal alang niya nga adto mag-opisina sa buhatan ni Garcia tungod kay mosugot ta og dili si Magpale maoy giila sa balaud nga acting governor hangtud nga malibkas ang kamanduan sa Malakanyang.
Busa tanang katungod ug pribilihiyo alang sa usa ka acting governor mamahimong gamiton ug pahimuslan ni Magpale. Lakip niini ang paggamit sa opisina sa suspendidong gobernador.
Dili mahimong pugngan ni Garcia sa paghimo niini tungod kay una lugar dili personal nga kwarta ang iyang gigasto pagpatukod sa maong buhatan.
Ikaduha wala niya panag-iyaha ang titulo sa buhatan sa gobernador. Samtang tinuod biktima si Garcia sa realidad sa politika apan dili ni igong rason aron dili ta mosubay sa gimbut-an sa balaud.
Mamahimong nakapabor si Magpale sa pagkakaron apan ang political reality mao nga posible nga mausab ang dagan niini human sa eleksiyon karong Mayo 13.
Ang angayang buhaton ni Garcia mao ang pagpaabot sa tukmang higayon ug sa pagpaningkamot nga ilang kaprotihian ang pagkontrolar sa ilang pamilya sa lalawigan sa Sugbo niining umaabot bugnong lugaynon.
* * *
- Latest
