Mga sipyat sa kaso ni Gwen

May nitumaw nga laing sukaranan nga angay’ng palagputon nang suspended governor Gwen Garcia ang iyang mga abogado. Kini human nihukom ang Court of Appeals (CA) nga di na tukion ang petisyon ni Garcia nga nangayo og temporary restraining order (TRO) batok sa pagsilot sa Malakanyang niya og unom ka buwan nga pagkasuspenso. Gibasol sa CA ang mga abogado ni Garcia sa pagtahan sa ilang orihinal nga petisyon sa TRO o status quo ante order alang sa bag-o nilang awhag nga luwatan ang writ of preliminary injunction batok sa Malakanyang. Mga nagsubay sa kontrobersiya makasulti nimo nga di ni maoy unang bulilyaso sa mga abogado ni Garcia.

* * *

Atol sa oral arguments sa petisyon ni Garcia sa hawanan sa CA sa niaging buwan, si Associate Justice Vicente Veloso, pangu sa 12th Division sa CA, ni-detalye sa duha ka dagkong kasaypanan nga posibleng nahimo sa mga abogado ni Garcia:

• Una, posibleng sayop ang Rule 43 sa Rules of Court nga gipasikaran sa petisyon ni Garcia kay nasentro sa irreparable injury (nga ni Veloso pa mas nipabor sa gobyerno kay ni Garcia), mas tukma untang Rule 65 nga nagtugot pagluwat og TRO pagpanalipod sa katungod sa duha ka partido; ug

• Ikaduha, posibleng sayop ang pagdangop ni Garcia sa CA kay ang Korte Suprema ra ang dunay gahom pagluwat og status quo ante order, nga maoy mas tukma nga pangayuon ni Garcia kay nasuspenso na man siya.

* * *

Kun padayong nalipat si Garcia sa sipyat sa iyang mga abogado, si Justice Veloso nipasabot nga gawas nga sayop ang balaod nga gigamit ug sayop ang korte nga gidangpan, nasayop na sab ang ikaduhang petisyon nga ilang gipasaka. Ang ganti sa ilang sunudsunod nga bulilyaso mao ang mas dugay nga pagpaabot ni Garcia.Naabtan ang CA og dul-an sa duha ka buwan sa paghusay sa mas laktod nga petisyon ni Garcia alang sa TRO. Pila kaha ka buwan ang gikinahanglan nilang Associate Justices Jane Aurora Lantion, Eduardo Peralta ug Veloso pagtimbang-timbang sa mas kuti nga mga merito sa kaso? Hinaot mahukman sa di pa mapupos ang lima ka buwan nga nahibilin sa kataposang termino ni Garcia.

* * *

Bisan klarong bugalbugal, may sukaranang tambag sa pipila nga nangangkong nagpakabana sa kawsa ni Garcia:

• Huwamang abogado sa magtiayong Aga Muhlach ug Charlene Gonzales nga nakakuha og TRO gikan sa CA batok sa kamandoan sa Regional Trial Court pagtangtang nila sa listahan sa mga botante sa Camarines Sur; o

• Kontratahong mga abogado sa higanteng mga kompaniya sa telepono nga kanunayng makakuha og TRO batok sa bisan unsang kamandoan sa National Telecommunications Commission (NTC) pabor sa mga konsumidor.

* * *

Email: [email protected].