Pamultaha na uy!

Misuroy ko sa dalan Colon kaniadtong Biyernes sa gabii kay duna ko’y gipalit sa usa ka department store. Nahasiga ang akong insikon unta nga mata dihang nalantawan nako nga may nag-inum og beer sa usa ka tindahan duol g’yud sa usa ka tunghaan.

Siyaro og wala gayud makabantay niini ang mga tinugyanan sa City Hall? Si monsinyor Achilles Dakay nga maoy pangulo sa Liquor Licensing Commission mahimo nga moingon nga naa ra siya kanunay sa palasyo sa Cardinal mao nga wala makakita.

Apan ang ubang sakop sa commission pastilan, bukha ‘sab nang inyong mga mata uy aron makakita mo unsay angay nga aksyonan. Gipahibalo na nako niini si Dra. Lucille Mercado nga vice chair sa commission.

Dili man ko motoo nga ang maong tindahan gihatagan og special permit sa mayor kay daan na nga si Dra. Lucille miingon nga supak g’yud si Mayor Michael Rama.

Pasagdi lang, abangan ninyo!

* * *

Kamo nga mga pasahero nga magpundok nga mag-atang og kasakyan, ayaw mo’g kompyansa sa mga tawo nga anaa sa inyong tupad kun dili ninyo kaila, bisan pa og posturawo og pamiste.

Diri sa atubangan nga bahin sa Freeman, among nabantayan nga duha ka tawo nga nagsul-ob pa og ID, desinte og pamarug, kauban diay sa usa ka tong collector.

Nakaingon ko nga kauban sila sa tong collector kay gikasab-an nila ang gwardya sa Freeman nga mibadlong sa tong collector nga nangilkil sa mga muagi nga PUJ drivers.

Dili kuno angay’ng manghilabot ang gwardya kun makakita og bisan unsa diha duol sa among opisina. Kini ra ba’ng atubangan sa Freeman daghan na nga nakuotan nga wala makabantay. Mao diay kay ang mangunguot, dili man mangunguot og hitsura.

Kun ako gani ang makakita, magsukdanay g’yud ta’s atong kaisog. Suko kaayo ko niining mga mangunguot ug mga kawatan kay sa duha ka insidente nabiktima mi og dul-an sa P50,000 apil ang “loan” tawon nako sa Pag-IBIG.

Dili ko maluoy nga todason sa mga vigilantes kining maong mga matanga sa tawo kay dili sila angay’ng pasanayon dinhi sa katilingban.

* * *

Kadtong mga kawani sa City Hall ug sa ubang opisina sa kagamhanan nga mapositibo sa drug test angay g’yud nga taktakon sa ilang trabaho.

Nakabantay ra ba ko nga ang mga hingtungdang opisyal nga angay unta nga mohimo’g aksyon molingiw-lingiw lang kun dunay ilang mga suod nga maapil sa pagka-positibo.

Dili angay’ng kaluy-on ang maong mga tawo. Abi kay sila dunay mga anak dili na lang diay taktakon? Naa ba gud sa balaud nga “exempted” sa pagpatuman sa balaud kadtong daghan og anak?