EDITORYAL - Isyu sa water dispenser sa asEras mibokal na sab

Nahilom  ang  konseho  sa siyudad  sa  giplano  nilang  pagkontrolar  sa  mga  water dispenser  o Automated Tubig Machine (ATM) nga  mopabuhagay og peso-peso  nga tubig  sa  mga aseras.

Ambot  kun unsay  problema  sa  mga  konsehal,  basin nahadlok  sila  nga di botaran  sa  mga  negosyante niining  maong  mga dispenser sa adlaw  sa piniliay.

Hinuon  wa may  mga  tawo  usab  nga  mireklamo  nga  nakainom  og  hugaw  nga tubig  gikan sa maong  mga dispenser.

Ang nabalak-an ni City Health Officer Stella Ygoña  mao  ra man nga  basin may  magbinuang   ug   butangan  og  hilo  o kaha  unsa  mang  hugaw  ang  maong  mga  tubig, aw  magdaguok  gyud  ang  tutonlan  sa  mga  makainom niini.

Maayo lang  kun  tutonlan lang  ang  modaguok,  ang  kuyaw  kun tiyan  na  maoy  moreklamo  nga mosangpot  ngadto  sa  makamatay  nga  sakit, kinsa  may  manubag.

Ang tinuod  kun  giatiman  lang  og  limpyo kada semana  ang  maong  mga ATM makaingon  tingali  ta  nga  di  lang  kay  panguwarta  ang  tuyo  sa mga  negosyante  nga nagpadagan  niini,  kundi  pagsilbi  nga tinud-anay  sa panginahanglan sa lawas  sa tawo.

Gani  wa ta masayod  kun  hinlo  ba  nga tubig    nga  gitubil  nianang   mga ATM, apan  hinlo  man ug  hugaw, pilit gyud  nga  moinom  ang tawo  ilabi  na  ang  mga  bata  o kaha estudyante  tungod  kay  nakondisyon  ang  ilang  utok  nga matag  tubig  nga isud  nianang  mga container  nga  pinatuwad   sa  pagbutang  limpyo.

Apan  ang  mga  may kaugalingong    water dispenser  sa ilang  kusina sama  sa mga  buotan natong  konsehal  ning  siyudad,  labi  gyung nasayud  nga sud sa duha ka semana  nga di kahinloan  ang  sud  sa water dispenser mag-akal  ang  lamog-lamog  nga  linugdang  sa tubig nga  gitawag  og mineral  water.

Unya  bisan  anaa kana  sa sulod  sa imong  balay, tungod  sa kahugaw  sa lamog-lamog  matawo  ang  mga pito-pito  sa sulod  niini  nga  kun magkompiyansa ka  malakip  nimo  sa pag-inom.

Kun ang  imong  water dispenser  nga  hinloan matag  semana  may  lawog  pa  gani  sa tubig  nga  mahibilin,  daw unsa  pa kaha  kanang  mga  ATM  nga anaa  sa mga aseras  nga tagpila na ka tuig  nga  way  hinlo-hinlo.