Buslot nga lagda

Piniliay na ‘sab!  Ang labing dakong kalihukan sa nasud kung diin di’ lang ang kagawasan sa pagpili ang himuon sa mga botante.  Kini ‘sab ang tukmang panahon nga mosiaw ang mga mangingilad--- ang mga bintahoso, ang mga baga og nawong, ang mga over-acting, ang mga mamalit og boto, ang mga magpaka-aron-ingnon, ang mga ambisyoso ug ang mga maihap lang sa tudlo nga matinud-anon sa panerbisyo.  Tunga-tunga sa pagpangandam sa Commission on Elections sa piniliay, mao ‘sab ang mga pagpagawas og bag-ong lagda.  Usa sa lagda nga angayan nga bantayan sa mga politiko o mga kandidato, mao ang Marso 28.  Sa maong adlaw, gimandoan ang mga kandidato nga limpyohan ang ilang hugaw!

Hugaw gyud kung isipon ang pagpamalit sa mga dagway ug panga’n sa mga kandidato bisan kun di’ pa panahon sa pagpangampanya.  Nagkadaiyang sukod sa mga posters ang gipapilit sa kadalanan, sa mga pader, sa mga tindahan, sa mga balay, sa mga poste.  Kuwang na lang papitlan ang nawong sa ilang mga supporter sa ilang bati nga dagway.  Gihimo ni sa mga kandidato tungod kay ‘technically’ wa’ pa man magsugod ang kampanya.  Matod sa Comelec, di’ pa sila pwedeng maggukod o masilotan sa ilang mga gipanghimo.  Di’ ba dakong insulto sa mga botante ug mga magbubuhis ang maong lagda?  Unsay buot ipasabot ini?  Yano lang.  Gitugtan kang makahimo og sayop tungod kay wa’ pa magsugod ang pagpatuman sa balaud nga nagdili ini.

Kanus-a ba nahimong tukma o makatarunganon ang paghugaw-hugaw sa pader ug sa atong palibot?  Ug kanus-a ba nahatagan og pagtugot ang si bisan kinsa magbutang sa ilang mga poster sa publiko nga mga lugar.  ‘Publiko’.  Nagpasabot nga adunay katungod ang si bisan kinsa nga mosaway, modili ug mobatikos sa mga tawo nga maghugaw-hugaw ini.  Tungod sa buslot nga lagda sa Comelec, makatarunganon bang magpapilit na lang sa ilang mga campaign material ang mga kandidato tungod kay di’ pa sila mahimong kapasakaan og reklamo sa Comelec nga maoy ahensya nga adunay direktang gahum kanila?  Nagpasabot ba nga katugtan ang mga tawo nga mohimo og kasaypanan tungod kay wa’ ang tukmang nga petsa sa pagpatuman sa maong balaud?

Dakong insulto sa mga tawo ang maong lagda sa Comelec.  Ug labaw nga dakong insulto sa mga botante ang gihimong pamintaha sa mga kandidato karong wa’ pa magsugod ang pagpangampanya.  Ang labing dakong leksyon mao, nga mahatagan og ngipon ang Comelec sa pagpatuman sa balaud.  Ug ang petsa 28 sa Marso ang mosukod sa ilang katakos sa pagpasaka og kaso o reklamo batok sa kandidato kansang mga posters di’ matangtang sa mga dapit nga di’ designated nga butangan sa campaign material.  Nanganti ang Comelec nga di’ ang mga supporter ang ilang pasakaan og reklamo kung dili mismo ang kandidato kansang posters makit-an sa mga di’ designated nga lugar.

Asa ang buslot sa maong lagda?  Simple ra.  Mahimo rang magpahimo og mga campaign material ang kontra nimo sa politika ug suguon ang iyang mga batos sa pagpapilit ini.  Pagka-ugma, atol sa pag-inspeksyon sa mga lugar, tataw nga ang mapasanginlan sa Comelec  mao ang kandidato kansang panga’n anaa sa poster.  Siya ang makasuhan bisan kun di’ siya ang nagpabutang.  Di’ ba dakong busloton ang maong lagda?  Kung buot sa usa ka kandidato nga dauton ang iyang kaatbang---simple lang ang iyang himuon, iya ning ikampanya pinaagi sa pagbutang sa iyang mga posters sa bisan asang dapit.

Di’ na bag-o ang piniliay sa nasud.  Apan hangtud karon, wa’ pa ‘ta maleksyon sa mga buslot sa maong kalihukan.  Makadaghan na ‘tang giilad, gisamok, gipalit, gibinuangan, apan hangtud karon--- wa’ pay tukmang lakang ang Comelec aron sa pagpatunhay sa atong piniliay.  Ang labing dakong hagit, wa’ sa Comelec.  Apan anaa sa mga botante nga di’ lang kutob mosaway sa kahiwian apan mopatigbabaw sa matarung.

Email: [email protected]. or [email protected].