EDITORYAL - Ombudsman paltos sa lamppost

Ang pagka-abswelto  sa  mga  respondente  sa kaso  bahin  sa   overpricing  sa  mga  lamppost  usa  ka  dakong  kapakyasan  sa Ombudsman Visayas.

Nakita  sa Sandiganbayan  nga  hungaw ug  huyang  ang  ilang  mga  pasangil  batok  sa  mga  respondente  hinungdan  nga  naabswelto  ang  tanan.

Ambot  di  diay  to tinuod tong giingon nga  may  mga  lamppost  nga  gipresyohan  og  tag P250  mil.

Kinsa  ba  sab  ang  nagpasiugda  niadtong  isyuha  nga  bug-at  man  kaayo  ang maong   pasangil.

Tiaw  moy  lamppost  nga  ordinary  kaayo  og  materyales tag P250 mil  ang  usa.

Sa sinugdan  niadtong  nahibawo  ang  mga  kawatan  sa pagsulbong  sa maong  isyu, may  pipila  kuno  kanila  nga  di makatug  kay  magpunay   kini  og  tutok, tiltil, ug  gipanid-an  unsa  gyuy  nakamahal sa  mga  materyales  sa  maong  mga  suga.

Kay  kun  imo  gud  nga  obserbahan,  ang  kayano  sa iyang  hitsura  nga  mao ra og   kawayan  nga  sag-obanan  og  tubig  sa taga  bukid  niadtong  wa  pa mauso  ang  mga  plastic  nga  container, di ka makatuo  nga mopresyo  og  P250  mil ang  matag  usa  sa maong  poste.

Kay  unsaon  man  nimo  pagkuwenta  ang  mga dapat  niini  gikan  sa iyang  lawas, pandong  nga  murag  sarok, ug  sud  niini  nga  pipila  ra ka lugas  nga  kuryente  uban sa suga  nga  komon  usab kaayo, lisud  gani  nimong  tuohan  nga makaabot  og P20  mil ang matag usa.

Maoy  hinungdan  nga  ang  mga  kawatan  nagduda  nga  gipasalip-itan  og  gold  ug  uban  ang  mahalong bato  ang  maong  mga lamppost.    

Apan  sa dihang  gisugdan  na  nila  og  kawat  unya  gipatimbang  sa  mga  junk shop  didto  masuta nga naglisud  gani  paghalin  og P500 kay tagpila ra may  kilo  sa puthaw.

Ang  ikapatimbang  sa  maong  mga  poste  mao ra man  ang  lawas  niini  nga  natural  nga tubo  nga  puthaw unya  ang  pandong  ug  ang  suga  di man mahalin.

Hinungdan  nga  gipasagdan  na lang  sa  mga  kawatan  ug  wa  na  gyud  nila  lingia  kanang  pipila  karong  nagbarug  sa  kadaplinan sa kadalanan  sa Mandaue ug  Lapulapu.

Angay  baya  kining  hinuktokan  sa taga  Ombudsman nganong  namasangil  sila  nga way ebidensya, hinungdan  nga  napaltos  sila.