Ilad sa mga BHW

Dili na angayan ikabalaka ni Mayor Nelson Garcia sa Dumanjug nga mailog pa sa kampo ni acting Gobernador Agnes Magpale ang “credit” sa pag-release sa financial assistance sa mga barangay health workers sa lalawigan.

Gipaninguha ni Nelson Garcia nga ang kredito mapunta sa iyang igsuon nga si suspendidong Gobernador nga si Gwendolyn Garcia.

Siyempre, maulaw usab si Magpale sa pag-angkon nga iya kining proyekto nga igo ra man gyud siyang naninguha nga ma-release kini human malangay og kadiyot tungod sa kagubot sa Kapitolyo nunot sa suspension order nga gi-serve sa DILG batok kang Gwen.

Apan dili man kini maoy isyu kalabot niining pundo alang sa mga BHW. Sulod sa dugay’ng panahon nga si Gwen Garcia maoy gobernador sa lalawigan, ang binuwan nga honorarium sa mga BHW mokabat lamang og P500 ngadto sa P1,000.

Unsa gud intawon ang mapalit nianang P1,000? Samot nang P500 matag bulan?

Ang gipanghambog ni Garcia nga cash gift nagkantidad lamang og P2,400.

Apan kada kanus-a man kini matilawan sa mga pobreng BHW sa lalawigan? Matag tuig ra gyud?

Ang mga BHW maoy gihimong “frontliners” sa Department of Health sa mga programa niini sa panglawas. Sila maoy mosungasong ngadto sa mga sitio aron mohimo og mga survey sa mga programa sa panglawas sama sa anti-dengue, anti-polio patak, ug paglista sa mga batang malnourished pinaagi sa paglibot panimbang kanila.

Pero sa ilang kahago pagbaktas ilawom sa naglagitim nga kainit sa adlaw ug kahumod sa ulan, ang mga barangay naghatag lamang kanila og puwerteng kagamay nga honorarium.

Unsa man ang nahimo ni Gwen Garcia anang problema sa mga BHW? Mao ra nang P2,400 nga cash gift matag tuig?

Kanang kantidara kulang pa na ipalit og tambal ug vitamins sa mga BHW nga mangasakit tungod sa ilang walay puas nga serbisyo.

Sa siyudad sa Sugbo, ang mga BHW nagdawat na og P4,000 nga honorarium matag bulan. Tungod kini sa counterpart nga gihatag sa kagamhanan sa siyudad sa Sugbo. Apil pa sila sa tinuig nga bonus ug bugas gikan sa barangay.

Wala ko makahinumdom nga naghisgot ang Kapitolyo ubos sa liderato ni Gwen nga mohatag og counterpart sa tag-P500 ngadto sa P1,000 nga honorarium sa mga pordoy’ng BHW sa kalungsoran. Kini bisan sa kadako sa panudlanan nga P2 bilyones sumala sa gipanghambog ni Gwen Garcia niadtong 2011 SONA, apan kalit nahanaw sa dihang gisuspenso siya sa Office of the President.

Unya hadlok pa gyud ang mga Garcia nga ilogon ang credit sa cash gift nga pwerte ra gyong gamaya.

Nailad ra ang mga BHW pagpatuong nakatabang si Gwen Garcia, apan sa tinuod, ang P2,400 nga cash gift consueldo de bobo ra gyud na.