Trabahoa dayon bi

Pagkanindot kun panguhaon na kining mga Automated Tubig Machines (ATM) nga anaa gibutang sa aseras. Gawas nga malikayan ang aksidente, makapaluag-luag pa kini sa aseras.

Abtika ra gud ang inyong mga mata dili ba makita ninyo ang pwerteng daghana nga automated water dispensers nga anaa gibutang sa aseras nga walay nagbantay.

Imbis anha diha moagi ang mga tawo, sa karsada na lang moagi ang mga tawo kay ang aseras gibutangan na man og ATM. Sa ako na nga giingon, posible nga ang agasanan sa tubig niining maong mga ATM butangan og hugaw, o kaha hilo sa mga badlongon.

Dili ba peligro? Awhagon nako si Raquel Arce nga maoy hepe sa PROBE team sa City Hall nga palihokon niya ang iyang mga sakop aron sakmiton kining mga ATM nga anaa sa karsada gibutang.

* * *

Gipaayo sa Cebu City Hall ang drainage system sa matag daplin sa V. Gullas Street, ilabi na gikan sa eskena P. Burgos Street. Apan tan-aw nako, bisan dili ko engineer, sayup ang ilang gihimo kay giwagtang nila ang gutter.

Resulta, ang daplin sa karsada gihimo na nga parkinganan sa mga sakyanan pinaagi sa pagpadaplin pag-ayo kay ang sidewalk kaniadto sayon na man lang sa sakyanan kay wala na ang gutter.

Kun dunay kusug nga uwan, ang tubig sayon na lang’sab nga mosuyla ngadto sa kabalayan kay wala na man ang gutter. Pastilan nga trabahoa. Tsk! Tsk! Tsk!

Awhagon nako ang kadagkoan sa CITOM nga pangdakpa ninyo ang mga drayber niining mga sakyanan nga miabuso pagparking diha o kaha guroya ang ilang mga sakyanan.

Mao bitaw ni nga makapanglingo-lingo ko nga maghuna-huna nga dunay mga tawo, apil na ni Mayor Michael Rama, nga misupak nga hingusgan ang “towing operation” dinhi sa dakbayan alang niadtong mga sakyanan nga ipataka lang og parking.

Karon, tan-awa dili ba misiaw na pag-ayo kining mga abusado? Mamalihug na lang ko sa akong mga amigo sa CITOM, nila ni sir Raffy Yap ug Joy Tumulak nga pahimoi ni kanunay og kampanya ang mga nag-abuso bi diri sa V. Gullas ug sa ubang mga dapit.

* * *

Kini bitaw nga mangalagad kita sa katawhan, daghan kaayo ta og mahimo kun inyo lang bukhon ang imong mga mata unya gamiton ang inyong utok. Buhata ra gud.            

Ang nakadaut gud sa ubang mga nagtrabaho sa gobyerno kay mokangkang ra man ang kamot nga mokubra og sweldo apan ligoy man sa trabaho. Paita ning mga tawhana nga gipasagdan lang ‘sab sa ilang mga opisyal.