EDITORYAL - Ang panagang human sa pagka-igo

Ang kahimtang  sa Palace of Justice  diin namatyan  og  tulo ka tawo  ug  usa  ang  naangol sama  ra  sa nahitabo  ni Manny Pacquiao  nga  gumikan  sa kakompiyansa  lukapa deretso’g katug.

Mao pay pag-ingnon, kun way kilat  di manguros kay  lagi malinawon  kaayo  ang  panahon  ug  ang  palibot.

Kaniadto sa milabay’ng  mga  tuig, higpit baya  ang  seguridad  sa Palace of Justice   sa Capitol compound diin  ang  ilang mga sikyu, gawas  nga  pangitaan  ka  og ID, rekisahon  gyud  ang  tanang  bahin  sa  imong  lawas.

Unya  pipila  ra man  to  ka  buwan,  human  niadto  tungod  kay  wa may  kagubot  nga nahitabo  sa maong  lugar,  may  panghinol  man  sa lawas  sa matag  tawo  nga  mosud  sa  maong  edipisyo  apan  murag  pormalidad nalang  ug  di  na gyud  kaayo  higpit.

Unya  abtik  usab kaayong  milihok  ang  ubang  mga  syudad  sa pagpahigpit  sa ilang  seguridad  sa kabalaka  nga  mahitabo  kanila  ang nahitabo  sa Cebu City.

Aw  maayo  man  apan  mao  lagi, inig-abot  sa pipila  ka  buwan, nga  way  mahitabo,  kapoyan  naman  ang  mga  guwardiya  sa  pagpatumang  higpit  sa seguridad.

Sama  ra sa  usa  ka tawo  nga  gumikan  sa kakapoy  nianang  magpunay  ka  og tangkil  sa imong  pusil , unya di ka kapamusil, makahukom  ka nalang  sa pagbilin  niana  sa imong balay, busa  kun pusilon  ka di gyud ka kabawos.

Angay  timan-an sa tanan  nga  kining tuig  sa water snake murag dinagko  ug ngilngig  kaayo  ang  panghitabo  sa pinatyanay.

Gani  wa pa ta masayud  kun  unsa  kahay  sunod  nga ngilngig  nga  panghitabo  dinhi  sa ato.

Kun di pamusil  ang  mamatyan  og  ubay-ubay, anha  sa disgrasya  sa sakyanan  sa kadalanan.  Makabintaha  niini  ang  mga  tawo  nga  kumpleto  og  accident ug  life insurance,  nagdata-data  og  lungon  ug  nagdata-data pa  og kalubngan.

Kay  karong  panahona  pagka-way siguro  sa atong  kinabuhi, diin  kun  di maangin  sa  disgrasya  sa sakyanan  sa kadalanan, sakyanan  sa dagat, sakyanan  sa kahanginan,  masugamak  ka sa  mga  bala.

Hinuon usa ra gyud ang  nasayran  sa tawo  nga  inigkamatay  niya, ang tanan  pagbuot  sa Dios, apan  kun mabuhi  siya  pagbuot  sa mga dios-dios.