Ma-obligar ba ang apuhan sa paghatag og suporta sa iyang mga apo?

Ang atong balaod naglatid kun si kinsa ang obligado sa paghatag og suporta. Nag-una sa listahan mao ang magtiayon nga diin kinahanglan silang mohatag og suporta sa usa’g-usa, sunod niini mao ang mga ginikanan nga obligado sa pagsuporta sa  ilang mga anak ug ang mga anak obligado sab nga mosuporta sa ilang mga ginikanan. Apan ang sunod nga pangutana, kun ang apuhan obligado ba usab nga mohatag og suporta sa iyang apo? Kana nga pangutana ang atong tubagon karon.

* * *

Dear Atty. Divine,

Maayong adlaw kanimo Attorney ug sa imong mga kauban sa Banat News. Aduna unta koy buot ipangutana kanimo. May anak ko nga babaye ug may ka live-in partner ug aduna silay duha ka mga anak, apan nagkabuwag sila kay way trabaho ang bana ug naulipon pa gyud sa drugas. Karon ang duha nila ka anak ako ang nag-atiman ug nagplano ko sa pagpangayo og sustento sa mga bata. Apan ang problema kay wa pa gani nako ma-file ang akong reklamo alang sa sustento gipusil patay ang mga amahan sa bata sa amo ra usab nga silingan. Ang akong pangutana attorney  1) Pwede pa ba nga akong ipadayon ang reklamo? 2) Kinsa akong pangayoan sa sustento ang ginikanan ba sa amahan sa mga bata o ang nagpatay sa amahan sa mga bata? 3) Asa nako-ifile ang reklamo? 4) Pila man ang amount nga angay nako pangayuon sa matag bata? Hinaut nga imo kong matambagan kun unsay angayan nako nga buhaton. Daghang Salamat and More Power to you! —Natoy

* * *

Dear Natoy,

Ubos sa atong balaod sa Family Code, ang mga ginikanan sa imong duha ka apo mao gyud ang nag-una nga adunay obligasyon sa pagsuporta sa duha ka bata nga imo karon nga giatiman. Apan tungod kay namatay na ang amahan sa mga bata, ang lain nimong pangayuan og suporta mao ang imong anak kay siya man ang inahan sa mga bata. Mamahimo sab ka nga mangayo og ayuda sa mga ginikanan sa amahan sa mga bata aron tabangan ka sa panginahanglan sa imong duha ka apo kay ila man usab kana nga mga apo ug sila man ang ascendants in nearest degree apan ang problema lang diha kun wa sab silay ikahatag nga suporta. Ubos sa atong balaod, ang Lolo ug Lola mamahimong pangayuan og suporta sa ilang mga apo ug vice versa apan kining tanan magdepende sa ilang financial capacity.  Samtang ang tawo nga nagpatay sa amahan sa mga bata dili sab nato ma-obligar sa pagsuporta sa duha ka mga bata, ang kaso nga angayang ipasaka sa  nagpatay sa amahan sa imong duha ka apo mao ang criminal case ug civil case alang sa  damages. Dili siya ma-obligar sa pagsuporta sa mga bata kay di man kana iyang mga anak apan kun adunay civil case nga gipasaka batok sa suspek mamahimo nga ang makuha unya niining bayad sa damages adto ihatag sa mga bata apan taas pa ang proseso niini kay moagi pa kini og trial sa kaso. Ang maayo nimong buhaton karon mao ang pagpangayo og suporta sa imong anak nga babaye alang sa imong duha ka apo ug mamahimo sab nga imong hangyuon ang pikas nga mga apuhan nga tabangan ka sa panginahanglan sa mga bata. Ang kantidad sa suporta sa mga bata, magdepende kana sa ilang panginahanglan matag buwan ug magdepende sab kini sa capacity sa mohatag unya sa suporta. Mamahimo nga imong ipasaka ang imong reklamo sa barangay lang una ug human niini adto na sa Korte. Hinaut nga akong natubag ang imong pangutana. — Atty. Divine

Alang sa inyong pangutana, ipadala lang sa Legal Corner sa Banat News or email sa [email protected].