Kasambahay Bill

Hangtud sa pagsuwat niini, wala pa kapirmahe ni Presidente PNoy ang Kasambahay Bill, ang balaudnon nga mihatag og daghang benepisyo sa mga domestic helper kon katabang sa panimay.

* * *

Dugay nang aprobado sa Kongreso ang maong balaudnon ug dugay nang naghuwat og pirma sa Pangulo aron mamahimo na kini nga hingpit nga balaud. Nganong nagdiki-diki man si PNoy sa pagpirma niini?

* * *

Ang Kasambahay Bill naghatag og daghang benepisyo sa mga katabang sama sa mataas nga binuwan nga suweldo. Ug kining mosunod:

* * *

* Membership sa SSS, Pag-Ibig, PhilHealth.

* Thirteenth month pay ug vacation leave with pay.

* Usa ka adlaw nga day-off sa usa  ka semana.

* Hospitalization.

* Ug uban pa.

* * *

Matud pa nga ubos sa maong  balaudnon, ang mga domestic helper kon mga katabang dinhi sa Pilipinas mas daghan pang benepisyo nga madawat kay sa mga domestic helper sa abroad kon gawas sa nasud.

* * *

Tungod niini daghan na unya ang dili na ganahan manarbaho isip DH sa gawas. Ug hayan makapamenus kini sa dollar remittances nga madawat dinhi sa Pinas.

* * *

Apan naay mga tigpaniid nga nagtuo sab nga daghan sab nga mga pamilya ang mobuhi sa ilang mga katabang tungod sa kamahal na unya sa maong mga katabang kun ila gayud nga tumanon ang gisugo sa balaud.

* * *

TRIVIA. Maayong buntag sa atong mga higalang magbabasa diha sa may Mambaling area duol sa jai-alai. Daghang salamat sa inyong nagpadayong pagsuporta sa Banat News.