Ang dancing gobernadora

Sa kaulahian nakahukom ra gayod ang suspendidong gobernadora sa pagsayaw sa miaging Sinulog grand parade. Kini bisan pa man sa mga kabalaka sa iyang mga igsoon ug sakop sa pamilya nga basin og bugal-bugalan lang siya sa mga tawo nga nasuko kaniya. Apan mas gipatigbabaw sa gobernadora ang iyang debosyon ni Senyor Santo Niño kay sa kahadlok sa iyang pamilya nga siya bugal-bugalan.

Sa dihang gipahibawo ang pagsayaw sa suspendidong gobernadora daghan ang nag-atang sa mamahimong reaction sa katawhan inig ka kita nila niini nga magsayaw. Dihang gipaila-ila na ang gobernadora sa iyang pagsayaw positibo ang nahimong reaction sa mga nanan-aw sa Sinulog sulod sa Cebu City Sports Complex. Sila nahugyaw ug ang uban nag-standing ovation.

Nganong ingon adto man ang nahimong reaction sa mga tawo dihang ilang nakita ang suspendidong gobernador nga misayaw? Wala kaha sila masayod nga ang nagsayaw nga gobernadora sa ilang atubangan suspendido? Simpatiya kaha ngadto sa gobernadora ang ilang gipakita nga reaction?

Ang pagsayaw sa gobernadora maingon nato nga usa ka sukdanan kun unsa ka lawom ang pagsabot sa kabag-ang katawhan sa kontrobersiya nga iyang gikalambigitan. Samtang ato nang nadungog ang bisan unsang mga pagsaway sa iyang pagka public official ug bisan gani sa iyang personal nga kinabuhi gikan sa uban apan wala pa nato madungog ang tingog sa kabag-ang katawhan nga nagpakahilom lang sa kontrobersiya. Seguro ang una niyang pagpakita sa publiko human sa usa ka buwan kapin nga pagluklok sa iyang opisina usa usab ka pagsukod ug pag-ila sa katawhan kun dawaton pa ba siya nila.