Hit and run
Sa akong pagsuwat niining lindog nagpadayon pa ang Sinulog Grand Parade.
Gawas sa usa ka dancer sa Cotabato nga giligsan sa usa sa mga kauban ni Mayor Michael Rama sa convoy didto sa may Imus wala pay laing mga dagkong panghitabo nga mitugaw sa malinawong kalihukan dinhi sa dakbayan.
Mireklamo ngadto sa media ang mga opisyal sa contingent sa Cotabato pinangulohan ni Gov. Lala Mendoza tungod kay giligsan sa convoy ni Rama ang tiil sa usa sa ilang mga dancers.
Si Rina Mae Macaraeg wala makapadayon pagsayaw tungod sa pagkaangol niini.
Gikinahanglan siya nga dad-on og ambulansiya paingon sa tambalanan tungod kay dili na kabarog ang maong bata.
Gawas nga nagdanghag lang ang wala pa mailhi nga kauban sa mayor gibiyaan pa gyud niini ang iyang biktima.
Matud sa usa sa mga opisyal sa contingent nga akong nahinabi nga bisan ilang gitawag ang atensiyon sa responsable mipaturatoy hinuon kini og padagan sa iyang motorsiklo uban ang grupo ni Rama.
Nganong gitugotan man sab sa mayor nga maggara-gara ang iyang mga higala nga niuban niya pagsusi sa rota sa parada?
Ang pait kay ilang gitalikdan ang obligasyon ngadto sa biktima.
Laing reklamo nga mitumaw kagahapon mao ang pinili nga gitugotan nga makapatong sa mga bleachers nga gitukod sa Cebu Contractors Association diha daplin sa rota.
Nasuta nga wala motuman ang mga kontraktor sa ilang gipirmahan nga MOA uban sa dakbayan nga magtukod og bleachers alang sa publiko.
Kini tungod kay dili abli alang sa publiko ang mga bleachers nga gihimo.
Ang nahitabo mao nga ang mga higala lang sa mga contractors maoy gitugotan nga makatungtong sa bleachers.
Kun alang sa publiko ang katuyoan niini angayang gihimong first come first serve ang paagi sa paggamit niini.
Ang nakabentaha hinuon karong tuiga mao nga nahiluna na og tarong ang mga sakop sa media nga nag-cover sa kalihukan didto sa sports center.
Salamat nga giandaman na sa Sinulog Foundation og flatform ang media aron mas hapsay ang pagtan-aw niini.
* * *
- Latest
