Labihang hapsay, labing lay

BRP Pampanga, Mactan Channel — Ang fluvial procession karong tuiga maoy usa sa labing hapsay. Way aksidente. Way nalunod. Way nagkabangga. Way nalumos. Way nisal-ot. Way nibabag sa barko nga giluwanan sa imahen ni Sr. Sto. Niño. Way kalangay sa pagdunggo sa imahen sa pantalan sa Dakbayan sa Sugbo. Gani, ang fluvial procession karong tuiga maoy labing mubo. Nagsugod sa untop alas-7 sa buntag. Nakadunggo ang galleon sa Pier Uno sa alas-7:26 sa buntag. Wa ra ganing kaabot og tunga sa oras. Mas sayo nga nasugdan ang foot procession gikan sa pantalan paingon sa Basilica del Sto. Niño. Sayo sang nasugdan ang misa pagbanhaw sa unang bunyag. Ug sayong nakapangandam alang sa solemneng prosesyon.

* * *

Apan ang fluvial procession karong tuiga mao say nakatilaw sa labing sibaw nga bagulbol. Mga deboto nga nikuyog sa prosesyon sakay sa dagkong mga barko, pribadong mga yate ug inabangan nga mga bangka gikuwangan ra. Kapin sa oras human nakadunggo ang galleon, ang nangapil nga mga sakyanan sa dagat padayong naglibutlibot, wa pa ganahing namalik sa ilang dunggoanan. Mas sibaw ang kahimangod sa mga molupyo sa Pasil ug kasilinganang mga barangay. Nga bisan sa pahibawo sa mga tigpasiugda nga di na moagi ang prosesyon nila mahinamon gihapon nga nangandam pagpaabot sa naandang pag-agi sa mabulukong prosesyon sa ilang kadagatan.

* * *

Angay’ng makaamgo ang mga tigpasiugda nga sayop ang hukom sa pagsugod sa fluvial procession sa alas-6 sa buntag. Wa ni nila mapatuman kay imposible ang pagkara-kara sa foot procession gikan sa St. Joseph National Shrine sa kinapusoran sa Dakbayan sa Mandaue paingon sa Ouano Wharf. Ngiob pa sang alas-6 sa buntag ning higayona sa tuig nga di pa hingpit nga mabantang ang kaanyag ug kalapad sa pasundayag sa dagat. Angay sab nilang dawaton nga labihang paspasa ra sa paglawig sa galleon. Ambot tungod ba kay namawi sa usa ka oras nga kalangay. Gawas nga labihang layoa ra gikan sa tampi nga gipunsisokan sa mga deboto.

* * *

Sakay ko ning command ship sa Philippine Coast Guard nga maoy nagduma sa prosesyon kay among gisuwayan ang katakos sa among wireless camera pag-transmit og live footage gikan sa tungatunga sa dagat, nga way microwave ni satellite. Malipayon kong mutaho nimo nga nakatampo ang bag-ong teknolohiya sa malampusong pagsumpay sa Sky Patrol uban ni Vilma Andales ug remote base sa Pier Uno uban ni Rico Lucena nga pulos nag-microwave. Pasalamat kong Capt. Rolando Punzalan, hepe sa Cebu Coast Guard Station, sa iyang kama-abi-abihon. Gipahalipayan nako siya ug ubang mga tigpasiugda sa fluvial procession nga usa sa labing hapsay. Apan hinaot angkunon sab nga usa to sa labing laay.

* * *

Email: [email protected]