Higanteng pinaskohan

Dili unta ako buot mag-apil-apil sa bingkil-bingkil sa mga senador kay si kinsa man ko nga manghilabot sa ilang gihimo, apan matud pa sa usa  kong higala nga medyo distinggido sab nga pagkatawo, sayop ang akong dili pag-apil-apil.

* * *

Kato pananglitan ang gipang-apod-apod ni Senate Presidente Juan Ponce Enrile  nga tag kapin sa usa ka milyon ka pesos sa iyang mga kauban sa Senado isip kuno Christmas gift, angay kuno kadto apil-apilan natong mga lungsuranong pordoy.

* * *

Matud pa sa atong distinggido nga higala, mas makadawat pa og grasya ug indulhensiya kun kadtong kantidara gipanghatag ni Johnny sa mga biktima sa bagyo ug lunop didto sa Mindanao.

* * *

Bitaw no? Ang gipanghatagan ni Sir Johnny mga kasenador niya kinsa kanunay busog ang tiyan ug komportabli ang pagpuyo sa ilang mga mansion.

* * *

Ang mga biktima tawon sa kalamidad didto sa Mindanao wa nay kapuy-an, wa nay bisti, nagpakilimus sa dan. Makalulooy ang kahimtang daghan man sab ang  naluoy ug nanabang apan kuwang ra gyud tawon. Daghan pa ang way kapuy-an.

* * *

Kadtong milyones pesos nga gipanghatag sa mga senador isip pinaskohan, dako unta tong matabang sa mga biktima sa trahedya. Apan, atol sa pagsuwat ta niini, wa pay bisan usa sa mga nakadawat sa maong pinaskohan ang nakahunahuna niini.

* * *

TRIVIA. Happy Pista Senyor kanatong tanan. Ug Pit Senyor sa atong mga higalang magbabasa niining atong Banat News.