Gobiyerno ni "Sabas buang"

Nanabod si Senate President Juan Ponce Enrile og dakung salapi ngadto sa mga senador. Ang 18 ka senador nga paborito niya gihatagan og P1.6 milyones matag usa apan P250 milyones lamang ang gitunol niya ngadto sa iyang upat ka mga kontra, labi na si Sen. Miriam Defensor Santiago. Si Enrile unang mitawag niining maong salapi nga christmas gift apan iya ra usab kining gikorihian nga alang diay kini sa maintenance and other operating expenses (MOOE).

Apan kadudahan kaayo kining pagbusog sa mga senador pinaagi sa paghatag kanila sa salapi nga magamit unta sa mga biktima sa bagyo ug ubang kalamidad nga hangtud karon wala pay balay ug naglisud pa sa pagpangita sa ilang pagkaon ug ubang mga inadlaw-adlaw nga panginahanglan.

Ako nagtoo nga tungod kini sa hulga nga ilisdan siya sa iyang pwesto tungod kay misupak siya sa Malacañang kalabut sa RH bill ug Sin tax bill nga karon nahimo nang balaud.

* * *

Ang mga tawo kanunay nga magpaabut sa eleksiyon aron magamit ang ilang sagradong katungod sa pagpili sa mga politiko nga maoy ilang sangonan sa pagtimon sa renda sa pangagamhanan.

Pinaagi sa sinawayay ug dinautay ilang maayag ang mga isyu ug pagkatawo sa mga kandidato.

Apan subo nga palandungon nga tungod sa salapi mausab ug masirado ang hunahuna sa ubang botante. Kun dili mahaylo sa kwarta hudlaton sila aron mapugos pagboto sa ilang kandidato.

Kining balasubas nga paagi mao kanunay gamiton sa mga yawan-ong politiko nga ang tumong ug tuyo mao ra gayud ang pagkupot og gahum aron gukdon ang ilang mga kaatbang ug aron makurakot ang buhis sa katawhan.

Ang resulta mao ang gobiyerno ni "Sabas buang."

* * *

Usa ka ehemplo niini mao ang politika sa Cebu City diin ang konseho kontrolado sa Bando Osmeña - Pundok Kauswagan (BOPK) nga kaatbang ni Mayor Mike Rama.

Tungod sa sobra'ng pamolitika gilaslasan pag-ayo ang budget nga gipangayo sa mayor. Ang ubang mga buhatan zero budget gayud. Lisud kining sitwasyon ni Mayor Rama kay minus kaayo ang mga mehoras nga iyang mahatag ngadto sa katawhan.

Naa man untay gahin nga giaprobahan sa konseho apan dili kini magasto sa mayor kun dili usa mananghid ngadto kanila.

Ang labing grabe mao kining cash assistance sa mga senior citizens nga P4,000 matag usa nga gusto sa konseho nga ipanghatag unya pa sa Hunyo. Nahadlok man gud ang BOPK nga makapabor ang mayor kun ipanghatag kini sa di pa ang eleksiyon sa Mayo, sunod tuig.

Napagan intawon sa walay puangod nga mga politiko ang mga senior citizens nga masakiton ug nagkinahanglan og salapi alang ipalit og tambal. Dako na kaayong tabang kining maong cash assistance niadtong mga tawo nga wala gayuy laing mahikap alang sa ilang pagpakabuhi. Ang kadaghanan sa BOPK councilors dili mobati sa dinaliang panginahanglan sa mga kabus nga senior citizens kay wala man sila makaagi og kalisud. Sayon ra usab sa uban kanila ang paghuom sa panudlanan sa gobiyerno.

* * *

Battle of propaganda na ang sitwasyon karon sa Kapitolyo tali kang acting Gov. Agnes Magpale ug suspended Gov. Gwen Garcia.

Samtang si Magpale miingon nga nagkalisud na ang panalapi sa Kapitolyo miinsister si Garcia nga hayahay pa ang pundo niini.

Ang gitumbok ni Magpale nga dili diay tinood nga daghan kaayo’g kwarta ang Kapitolyo sigun sa gipatoo ni Garcia nga moabut og binilyon.

Kalabut sa mga prayer rally sa duha ka habig mapasigarbohong gipahibawo ni Garcia nga mas daghan gayud ang iyang mga dumadapig kun itandi sa mitambong sa misa sa Liberal Party (LP).

Wa pa gani mauga ang laway sa suspendidong gobernador nipahibawo dayon ang LP nga mopasaka sila og kaso tungod sa paggamit sa mga sakyanan sa lalawigan, apil na ang tourist bus sa paghakot sa mga tawo sa One Cebu ni Garcia. Ila usab nga gitumbok nga adunay daghang taga-Cebu City (nga dili makabotar sa pagka-gobernador) ang mitambong sa prayer rally ni Garcia.

Nagkinihaay na usab ang mga pulis nga gidudahang midapig kang Magpale ug sa anak ug mga higala ni Paolo Garcia, anak sa suspendidong gobernador. Sa dihang nahuman ang oral argument sa temporary restraining order (TRO) nga gipangayo sa suspendidong gobernador ang duha ka habig pulos nangangkon og kadaugan.

Sumala sa kampo ni Garcia nga pabor kanila ang mahimong hukom sa court of appeals (CA). Ang LP mitumbok usab sa pagpanginsulto ni CA chairman Veloso sa mga abogado ni Garcia sa pagamit niini sa rule 43 inay 65 sa rules of court. (Sa pagsulat niining lindog niadtong Miyerkules, wala pa makahukom ang CA kalabut sa maong kaso).

Daghan ug magpadayon pa kining maong battle of propaganda samtang dili pa makabalik si Gwen sa iyang pwesto sa Kapitolyo.

* * *

Magpasalamat ako nga nabalhin na gayud og destino si Cebu District Collector Ronnie Silvestre. Siya na ang OIC sa Clark International Airport puli kang Clark Collector Edward dela Cuesta nga mao ang mopuli kaniya dinhi sa Sugbo. Si Collector Ma. Lourdes Mangaoang nga kanhi district collector sa Sugbo mao na karon ang district collector sa Port of Cagayan de Oro. Iyang gipulihan ang kontrobersiyal nga collector sa Cagayan de Oro nga si Anju Castigador nga karon anaa sa floating status sa Office of the Commissioner.

Bisan og dugay nga giaksiyonan ang atong yangungo magpasalamat gihapon ako kang Commissioner Ruffy Biazon.     Hinaut pang mahunong o bisan mominus na lang ang smuggling dinhi sa Cebu port.

* * *

Nasayud ba kamo nga tambal sa ubang sakit ang uling kon activated charcoal? Sa detalye pangitaa kini sa internet.

Email: [email protected]