Naglisod unsaon pagtapos
Gipatokar atol sa rally sa mga dumadapig ni suspendidong gobernadora Gwen Garcia sa tugkaran sa Kapitolyo sa Sugbo sayo karong buwana mao ang “Magkaisa.†Nga usa sa nahimong simbolo sa pakigbisog sa katawhang Pilipinhon batok sa diktadura ni Ferdinand Marcos.
Sugbuanon nga nakaagi sa tapok, nga mahimong gisapot kay naapil og katanggong sa pagkabara sa trapiko, o tinuod gyud nga nabalaka nga tingali’g nakalimot ang mga dumadapig ni Garcia kinsay ilang giprotestahan, wa kapugong pagpangutana sa mga nanambong sa rally, “Taym pa ra gud, di ba kang Cory ug Noynoy man nang kantaha?â€
* * *
Ang pagpatokar sa “Magkaisa†usa lang sa mga timaan sa kalibog sa tumong sa protesta ni Garcia batok sa iyang pagkasuspenso. Unsa may kapuslanan sa iyang pagpabilin sa Kapitolyo nga wa na may motuo sa iyang pirma? Nga ang mga kawani ug tanang department heads ni-amen na man ni Acting Governor Agnes Magpale? Nga bisan gani ang iyang kinaham nga mga kontraktor, suppliers ug caterers tua na man maningil ni Magpale?
Unsa may kapuslanan sa pagtapok sa iyang mga dumadapig? Nga wa man silang kadani sa suporta sa kinabag-an? Sakmiton ba nilang Kapitolyo? O igo lang manglaba ug manghayhay samtang nagpaabot sa temporary restraining order nga wa pay timaan nga maluwatan?
* * *
Ang subli-subli nga pagpasangil ni Garcia nga nipahamtang og martial law batok sa iyang pamilya si DILG Secretary Mar Roxas mao ang pagkumpisal nga nakalimot o ignorante gyud siya sa kasaysayan:
• Iyang amahan nga si Kongresista Pablo Garcia gipasanginlan nga usa sa labing lunod patay nga tigpaluyo sa bangis nga pagpanggukod ni Marcos sa oposisyon ug mga aktibista sa Sugbo nga nangahas pagsukol sa diktadura;
• Amahan ni Roxas, si anhing Senador Gerry Roxas, mao ang usa sa labing isog nga nibatok sa diktadurang Marcos dinhi sa Sugbo, sa kaulohan ug ubang bahin sa nasud.
* * *
Dakong opisyal sa gobyerno, nga nagsubay sa talagsaong politikanhong kinaadman ni Garcia, nga nisangpot sa malampuson nga paghiusa sa iyang mga alyado ug pag-inutil sa iyang mga kaatbang, niingon nga sa labing unang higayon niapil si Garcia og duwa nga wa siyay ideya unsaon pagtapos. Nagkadugay ang pagtanggong sa iyang kaugalingon sa Kapitolyo, nagkaklaro nga padayon ang naandang mga pangalagad ngadto sa mga magbubuhis ug nisamot katungason ang iyang pagkumbinser sa korte nga nisangpot sa dakong kadaot ang iyang pagkasuspenso.
Mas sakit mao nga andam na untang mokanaog sa iyang buhatan pinaagi sa gipaigot pag-ayo nga pagsayaw sa Sinulog Grand Parade. Apan ang daginuton nga graceful exit gibunlot pa gyong Magpale. Kinsa nipasalig nga way mobabag ni Garcia kun ganahan pang mobalik sa Kapitolyo human sa iyang pagsayaw.
* * *
Email: [email protected]
- Latest
