Ang pag-ampo ingon sa pagkinabuhi

Ang pag-ampo dili lang usa ka kamandoan sa Dios ni sa Simbahan.

Usa kini ka paagi sa pagkinabuhi. Mahimo lamang kining mabulokon ug makahuloganon kun ang tawo mohimo sa pag-ampo ingon nga bahin sa iyang kinabuhi.

Ang pag-ampo dili ikapamugos diha sa tawo apan sa laing bahin, angay kining ipukaw sa matag tawo nga nagpangita sa kahulogan sa kinabuhi.

Ang pag-ampo nga usa na ka bahin sa sistema maoy magdala sa matag tawo aron mohimo og mga maayo…kun gusto ka nga mamahimong maayo, nan, pag-ampo sa kanunay.

Tubag sa pag-ampo

Tradisyon na ni suspendidong gobernador Gwen Garcia ang pagsayaw og Sinulog sukad pa sa unang tuig sa paglingkod sa pwesto. Bisan sa mga panahon nga nagsugod na pag-aslom ang ilang relasyon ni kanhi mayor ug karon Kongresista Tomas Osmeña, wa’ ni makapugong sa tinuig nga tulomanon ni Garcia sa pagsalmot sa usa sa mga contingent gikan sa lalawigan sa Sugbo. Bisan sa mga pagsaway nga kontra-kompas ang mga tikang ni Garcia, wa’ ni makapugong niya aron mosayaw sa tinuig nga kasaulogan. Luyo sa mga kabalaka kaniadto sa seguridad kung mosalmot pa siya sa street dancing, wa’ ni mahimong babag ni Garcia aron mosayaw sa entablado aron pagpakita sa iyang debosyon.

Karon sa labing kontrobersyal nga sitwasyon ni Garcia, nagpakita og usa ka paglaom ug milagro ang Sinulog festival aron magamit sa gobernadora alang sa gitawag nga ‘graceful exit’. Kung ang pagpamatuod sa katawhan sa iyang pulong nga di’ niya biyaan ang iyang buhatan tungod kay siya ang gipili sa mga Sugbuanon sa ikatulo nga termino, nabuhat na ni   Garcia. Igo na ang halos usa ka buwan aron ipakita sa katawhan ang iyang prinsipyo nga di’ siya sayon-sayon nga matarug bisan sa presidente sa Pilipinas. Igo na ang usa ka buwan alang sa mga sakop sa media nga gikapoy na pagpaabot sa mga mosunod nga panghitabo sa Kapitolyo. Igo na ‘sab ang maong panahon aron pamatud-an nga normal ug hapsay ang lakat sa Kapitolyo luyo sa maong kontrobersiya.

Imposible sa tanan nga lubagon ni Presidente Noynoy Aquino ang desisyon sa pag-suspenso ni Garcia. Sama nga imposible ‘sab nga mohimo og lakang ang Court of Appeals nga sukwahi sa desisyon sa Malacanang. Di’ ba mas dakong sagpa sa administrasyong Aquino nga human gipagawas ang unom ka buwan nga suspensyon, buko-bukohon lang sa Court of Appeals ug ihatag ang gipangayong temporary restraining order ni Garcia. Lisud tuhoan nga human sa maong hait nga lakang sa Malacanang, mahimo lang diay ning mapakgang sa CA pinaagi sa pagsanong sa gipangayo sa mga Garcia. Ang giingon nga tulo o upat ka adlaw sa di’ pa ang desisyon, giingon nga na-desisyonan na pinaagi sa wa’ pagpagawas og TRO human gyud sa gipahigayon nga oral argument sa miaging semana.

Ang Sinulog festival ang mamahimong tubag sa pag-ampo ni Garcia unsaon sa paggawas sa Kapitolyo nga mas di’ dakong uwaw sa iyang bahin. Kung nabalaka siya nga bugalbugalan sa mga tawo samtang mosayaw, di’ na lang siya mosayaw inay sa entablado na lang. Sa maong paagi, mas nipis ang kahigayonan nga ma-boo sa mga tawo. Gawas na lang siguro niadtong wa’y kaikog nga mopaka-uwaw niya. Ang Sinulog nga maoy nahimong tukmang okasyon aron ipadangat sa publiko ang maayong relasyon tali sa dakbayan ug lalawigan, bisan pa sa ilang di’ maayong relasyon kaniadto ni Tomas Osmeña, karon kini ang mamahimong maayong paagi aron di’ na balikan ni Garcia ang iyang buhatan.

Ang Sinulog ‘sab ang tukmang lakang aron ihinayon ang dugay nang gihugon-hugon nga pasirhan ni acting governor Agnes Magpale ang iyang buhatan. Sa mao nga paagi, wa’y gubot nga motumaw ug mas hapsay nga mapahigayon ang pagtangtang sa mga gamit ni Garcia. Ug sa pagka-Lunes sunod semana, mahimo nang mag-opisina si Magpale sa buhatan ni Garcia nga ilang gi-ukopa su’d sa halos dise otso ka tuig lakip na sa panahon sa iyang amahan nga si Kongresista Pablo.

Apan kung nangita pa gyud og laing salida si Garcia, mahimo siyang mobalik sa Kapitolyo human sa iyang pagsayaw. Ug kung masirhan na ang iyang buhatan, mahimo siyang manuktok o mohilak sa hilom. Usa ka senaryo nga mas ganahan kaayo sa media ug mahimo pang magamit ni Garcia batok sa administrasyong Aquino o sa mga taga Liberal. Kung ganahan gyud si Garcia nga mo-ilog sa mga banner story o front page sa mga mantalaan o mamahimong headliner sa telebisyon, kini ang iyang himuon.

Email: [email protected] or [email protected].