EDITORYAL - Unsa gyuy tinuod bankrupt ang Capitol o di?

Maayo  nga klarohon kining isyuha, kay pulos naman edukado ang  taga Sugbo  ug  wa man  ta  magpuyo  sa lasang  aron matawag  nga di pa ta  sibilisado  busa  di  kita angay  lipat-lipaton  sa namunoan  sa atong  kagamhanan.

O tinuod  nga  kamong anaa  sa katungdanan  maoy bugtong representante  sa katawhan  aron  bantayan, ampingan  ang  mga rekurso  sa lalawigan  alang  sa panginabuhi, panglawas, trabaho  ug  mga  proyekto  alang  sa katawhan.

Apan  niining  bag-o,  kalit  lang miulbo  ang  isyu  nga bangkarota  na ang  panudlanan  sa  Kapitolyo  ug  halos  wala  na  kini  ika-suweldo sa iyang  mga  kawani  karong Enero 15. Ha? Mahimo  ba  kana?  Ang  mga trabahante  gihulagway  nga kakha  tuka, ug  sulod  sa 15 diyas  nga kinakha  niini  kinahanglang  pag-abot  sa tingsuweldo   may madawat  kini  aron  ikapanubag  sa utang, gasto  sa eskuylahan  sa mga anak  ug  uban  pa.

Apan  ngano  nga  sa bahin sa  gisuspenso  nga  gobernador  mopatigbabaw  man  ang  baruganan  niini  nga  wa  mabangkarota  ang  Kapitolyo  ug gihagit  pa niini  ang  gobernador  nga  mipuli  kaniya sa usa ka debate?

Aber, tug-ani  kuno  ang  lungsod  ug katawhan sa tinuod, ang  nagbaha  nga  mga  negosyante  nga naningil  sa minilyon  ka pesos  nga utang  sa Kapitolyo  kanila, kamatuoran ba  kini  nga  wa  na gyuy  matilok  ug matiti  nga  kuwarta  gikan  sa panudlanan  sa kagamhanan  sa lalawigan?

Nganong  wa man  ni bayri  nga  matud pa  sa suspendidong  gobernador  nga  naglaundok  man  ang kuwarta  sa Kapitolyo?

Kun tinuod  nga  may kuwarta  ang Kapitolyo, ang  usa  ka  lider  nga maayo  makaako  ba  sa pagpaantos  sa  mga  serbisyo  sa ubang  tawo  nga di mabayran?

Kun tinuod  nga  anaa pay  kuwarta  ang  panudlanan  sa lalawigan  basin  nalipat  lang  ang  kasamtangang  gobernador?  Kay ngano  ba  asa ba  diay  tagui  kining kuwartaha  ug  nganong  wa man  kini   hitultoli  sa bag-ong  gobernador?

Palihug  ayaw  ninyo  lipat-lipata  ang  mga  Sugboanon kay mayoridad  kanatong  tanan edukado, itug-an  ang  tinuod  kay  ang  pagpamakak  maoy  labing  makapaunlod  sa personalidad, kridibilidad, ug  kadungganan  sa usa ka tawo      ug  ang  pagkamatinud-anon kon honesty  maoy  makapatuboy  sa maayong dungog  sa  usa  ka  tawo  diin  angay  ilansang  ang  pagsalig  sa tanan  sa iyang  pagka-kasaligan.