Balaud sa kahimsog

Ang usa ka nasud sama ning atoa sa Pilipinas, aduna kanay batakang balaud nga maoy tamdanan nga sundon alang sa kalamboan o kahimsog sa kagamhanan. Mao usab ang atong lawas adunay gibuhat o giplastar nga balaod alang sa kahimsog sa panglawas, nga kun imong tumanon magpabilin kang himsog sa tibuok mong kinabuhi. Apan kun atong supakon,  mahimong suki nato ang sakit.

Bisan hari o emperador o gamhanang tawo kapa, way kurapsyon dinhi kay kun molapas ka aning balaud sa kahimsog, mas mouna ka pang mamatay kay sa niadtong tawo nga ordinaryo lang. Kay wa kini eksepsyon o gipili nga dato o pobre. Wala’y gipalabi ang diyos nga maoy nagbuot aning balaora, patas kini sa tanan. Usahay tungod sa atong pagpasagad, gimahay pa nato ang kahitas-an, ngano gihatagan siya’g mabug-at nga balatian o grabeng pag-antus sa sakit.

Dunay usa ka dato nga pasyente, dakung tawo sa mga kompaniya. Pero masakiton og kasingkasing. Miingon sa doctor niya, “Ngano nga may gipalabi ang Diyos nga 35 anyos pa siya, masakiton na. Ang uban gani, mag 80 anyos na, wa may sakit ug himsog pa kaayo ang panglawas. Kademalas gyud nako.”

Kalma mipasabot ang doctor sa pasyente, “Abe mo pareho tang mga anak sa Diyos. Gihatagan tang tanan og kahibalo o kagawasan sa pagsunod sa epekto sa unsay gusto nato ning kinabuhia. Mahimong ang tawo di patas sa pagtan-aw sa gihimo sa Diyos. Yano ra ang balaud sa kinaiyahan. Kun unsay gusto mo nga buhaton, mao say maangkon nimo. Di ka magmahay, imo man nang kagustohan.

Busa aron di ka magmahay, simple ra ang pormula: Tumana ang balaud sa kahimsog. 1) Hustong pagkaon ug pag-inom 2)Igong ehersisyo 3) Paglikay sa sigarilyo 4) Limitahe ang bino ug 5)Balanse nga sikolohiya. Di ba, sayon ra?