P100 million gisakiyo sa mga polis?

Sipa kaayo  ang  pasangil  nga  ang jueteng  lord  nga  usa  sa 13 nga   nangamatay  sa pinusilay tali  sa kapolisan  niadtong  Domingo  didto  sa Quezon  nagdala  og P100 milyones  nga  kuwarta apan  nawagtang  kini  daw aso.

Sa bahin  sa kapolisan  sila  ray nasayud  kun  si kinsa  kanila  ang  misakiyo  sa maong  kuwarta.

Ang P100 milyones, kun  giusa  kini  pagsulod  og  sudlanan  di masipitan  o  kaha  ikaluklok  og  bulsa.

Busa  mahimong  nagbaguod  pagpas-an  niini  ang  misakwat  sa  maong  salapi  mahimong  gisud  kini  og  sako  o  kaha karton o ambot unsay   gisudlan  niini.

Tungod  kay buntaog  man  kaayo  ang  sudlanan  sa maong  salapi, mahimong  di  kini  ikatago  sa  misakwat  niini  ngadto  sa iyang  mga  kauban  busa  labing siguro nga  ang grupo  sa  mga  polis  ug  sundawo  nga  mipatay  sa 13  ka  tawo  nga nagsakay  sa 2 ka SUV silang tanan  nasayud  niini  kun  ugaling tinuod  man  ang  presensya  sa maong  kuwarta  atol  sa  pinusilay.

Taym  pa,  giingon  nga  may  mga  polis  ug  mga  sundawo  nga  misikyu  kuno  sa  jueteng  lord  nga nagdala sa  maong  cash apan  nahilakip  sa pagkamatay  dihang  girapido  sila  sa  mga  kapolisan  ug  sundawo  nga  nagbantay  sa usa  ka checkpoint  sa maong  higayon.

Daghan  bayang nagduda  nga  kun  tinuod  nga  may kargamentong P100 milyones  ang  maong  mga  biktima, wa kaha  tuyoa  sila  pagpatay  aron  maesmokoy  ang  maong  kuwarta?

Nganong  gihurot  man  sila  pagpatay  ug nganong  nawagtang  man  daw aso  ang  kuwarta  human  sa ilang  kamatayon?

Sa laing bahin  tinuod  usab  kaha  gayud  nga  nagdala  og  kuwarta  kadtong  grupoha?  Di  kaha  kini  butang-butang  lang aron dauton  ang dungog  sa  mga  otoridad?

Pagbuto  sa maong balita  giingong  mga  hired-killer  ang  maong  grupo ug  mga  rebelde  pa  gyud  nga  komunista.

Pagkaugma,  giingon  na  usab  nga  may  mga sundawo  ug  polis nga  mieskort  sa jueteng  lord  sa maong  higayon.

Unya  gipatay  silang  tanan  sa kapolisan    kay  miuna  kuno kini sa  pagpangrakrak  kanila ug  wa mohunong sa ilang  checkpoint. Unsa  gyud  kaha ang  tinuod.