"Weder weder"
Ang usa sa mga banggiitang sakop sa defense panel ni kanhi Chief Justice Renato Corona maoy makiglantugi didto sa Court of Appeals karong Miyerkules alang ni Gobernador Gwen Garcia.
Si Atty. Tranquil Salvador III maoy gikuha nga abogado ni Garcia alang sa iyang petition nga nagkwestiyon sa unom ka buwan niya nga pagkasuspenso diin gitakda sa CA ang oral argument niini karong Miyerkules.
Gawas ni Salvador magsilbi gihapon nga kabahin sa panel ang anak mismo sa gobernador nga si Atty. Cristina Garcia Frasco.
Samtang magsilbing kabahin sa ilang mga legal advisers ang mga banggiitang abogado ug kongresista, ang amahan ug anak nga sila si Deputy Speaker Pablo Garcia ug 3rd district Rep. Pablo John Garcia.
Apan ang pangutana mosaler ba ang maayong laki nga mga abogado sa Malakanyang?
Atong nasaksihan giunsa paglungi sa Malakanyang ang gahom gikan sa ubang mga kaalyado ni kanhi presidente Gloria Macapagal Arroyo.
Gikan ni Ombudsman Merceditas Gutierrez hangtud ni Corona atong nakita giunsa paggamit sa Malakanyang ang gahom niini aron sila matangtang sa pwesto.
Niining tanan nga panghitabo, kinsay mangahas sa CA pagbadlong sa Malakanyang?
Kinsay ganahan madugang sa listahan sa mga target sa Malakanyang?
Bisan ang kampo sa mga Garcia nasayod nang daan nga labihan gyud ka subidahon sa ilang tinguha nga makakuha og temporary restraining order.
Kini tungod kay misaylo na sa legalidad ang away. Nisulod na ang politika busa bisan unsay imong dag-anan sa legal nga lantugi ang lintunganay mao nga mopatigbabaw gyud kinsay gamhanan.
Ug kining tanan atong makita sa panghitabo sa palibot. Sumala dunay mga kaalyado si Presidente Aquino nga dugay ra'ng gimando sa Ombudsman nga isuspenso apan nagpabilin sa pwesto tungod kay wala ipatuman sa Dilg, ang samang ahensiya nga mipatuman sa suspension ni Garcia.
Mao nga kun akoy Garcia dawaton ko nalang ang sakit nga kamatuoran nga sa politika "weder weder" lang.
Ug maoy paningkamutan nga sa moabot eleksiyon modaog ang iyang manghod.
Sigurado nga human sa Mayo nga piniliay mausab ang kamada sanglit mosugot si Aquino ug sa dili maisip na siya nga "lame duck" president ug dili na sama karon kagamhanan sa politika.
* * *
- Latest
- Trending
