Ang kabililhon sa gatas

Maoy sagad ang anaa sa pagtuo sa uban, ang gatas maayo lang kuno sa masuso o batan-on pa. Unya inigkahamtong na, ma-uwaw na moinom og gatas, kay lagi binata kuno, hadlok ingnon nga wala pa malutas gikan sa inahan. Husto kaha ni?

Hangtud kanus-a ba kita moinom og gatas? Matud sa usa ka inilang doktor ug propesor nga intsik, si Hong Zhao Guang, gikinahanglan ang gatas gikan sa pagkahimugso hangtud na sa tibuok nga kinabuhi. Unsa ba’y mga benepisyo ani?

Matud niya, moinom gyud ta og usa ka baso o 300 mg nga calcium, igo na nga maoy gikinahanglan sa kada adlaw. Daghan sa tawo nga tag-as ug bus-ok, himsog ang lawas bisag edaran na, tungod kay kusog sila moinom og gatas.

Dugang pa niya, dagha’g bentaha ang mga pagkaong intsek apan kulang sa calcium. Unsa may mahitabo kun kulang sa calcium ang tawo? Una, manakit ug huyang o gabok ang kabukogan. Mosakit pud hasta ang hawak, likod, paa ug batiis. Ika-duha, mabako o mabuktot ang likod. Ika-tulo, biklonon og bukog. Mahapla lang gani nabalian na ang bukog. Mao gyud kini ang sagad mahitabo.

Mao nga niadtong human sa ika-duhang gubat, ang mga alyansang nasud sa Amerika, mihimo’g programa sa pagpanghatag og gatas nga pinulbos alang sa atong kabataan nga nanagtungha niadto putot ug bukogon intawon sa kagamay. Mga Hapones niadto bakang ug mugboon, lahi na karon kay mitubo man  ang sa naandan nilang gitas-on ug nalig-on ang panuhod tungod sa pag-inom og gatas.

Unsa may oras nga angay kita moinom og gatas? Mas maayo sa gabii sa dili pa matulog, kay ang growth hormone sa gabii man moepekto inig katulog na. Patabanan usab og natural food supplement nga may bitamina C ug bitamina B. Di lang kay makapataas sa tubo, makontrol usab ang timbang ug lig-on pa ang resistensya sa panglawas batok sa mga sakit.

Apan aduna gyu’y tawo nga lain pud ang reaksyon kun moinom og gatas. Maglain ang ilang tiyan o ginhawa-an. Ang uban kasukaon kay wala na maanad.

Kung mao mahimo man pulihan sa pag-inom og yogurt. Ug kun di pa gyud, naa pay gatas gikan sa tanom nga soya milk. Dobleha lang ang gidaghanon kay minus man kini sa calcium sa mga dairy milk o gatas gikan sa mananap.