Buotan ang tulo ka Hari

Enero 6 tulo ka hari miabot sa Herusalem aron moadto sa dapit nga natawhan sa Batang Hesus. Sanglit wala man sila masayod sa tukmang lugar, nakigkita sila ni Herodes, ang bagsik nga hari sa maong dapit. Ilang gisultihan si Herodes nga nahimugso na ang Bata, kinsa gitag-an sa mga propeta nga mamahimong hari sa tibuok kalibotan. Dayon nangutana ang tulo kun nakahibawo ba si Herodes hain ang nahimutangan niini?

Nakita nilang Melchor, Gaspar ug Baltazar, ngalan sa tulo ka hari, ang pagkaguba sa dagway ni Herodes human makadungog sa ilang gisulti. Ingon sa dinhay nagpahipi nga kabalaka sa kahiladman sa daw wala mahimutang nga hari. Ug nabasa kini sa tulo ka maalamong linalang dinha sa nawong ni Herodes.

“Mao ba? Hala, pangitaa ninyo Siya. Ug kun makaplagan ninyo, balik dayon dinhi ug sultihi ko.” Mandar ang gitubag ni Herodes. Nalimot siya nga ang iyang gikaatubang mga hari usab. Si Melchor, sa Persia. Si Gaspar sa India. Ug si Baltazar sa Arabia.

Wise ang tulo ka hari. Pahiyom day ilang gisukli sa mapahitas-ong Herodes. Dayon, namiya sila aron ipadayon ang pagpangita sa bag-ong natawong Mesias.

Lawom na ang gabii. Kidhat sa mga bituon ang naghatag og dan-ag sa ngitngit nga dalan. Dihang...may usa ka siga ug hayag kaayong bituon nga kalit lang mipatungod kanila. Naglihok...ingon sa naglakaw sa kahanginan. Ila kining gisunod. Ug didto kini mohunong sa dapit nga maoy ilang gipangita -- ang pasungan sa baka, diin ang mga uhot maoy gihigdaan sa Batang Hesus.

Nagdungan pagyukbo ang tulo ka hari. Nangluhod dala ang tagsatagsa nila ka mga gasa: bulawan, insenso ug mira atubangan sa giila nilang umaabot nga hari sa tanang hari. Unya, dihang mibiya na sila sa pasungan, wala sila mobalik ngadto ni Herodes. Natimahoan man gud nila nga may daotang plano si Herodes batok sa Batang Hesus. Hinungdan, nga hilom silang mipauli sa tagsatagsa nila ka gingharian. Buwahan, dili matultolan ni Herodes ug sa iyang mga sundalo ang nahimutangan sa Anak sa tawo, kinsa gipadala sa Iyang Diyos nga Amahan dinhi sa yuta pinaagi sa putling sabakan ni Birhen Maria aron pagtubos natong tanang makasasala.

Pagka-buotan sa tulo ka hari. Ilang gikalimtan ang pagkahalangdon nila. Ug wala’y pupanaganang miyukbo sa tumang pagpa-ubos ning Linalang nga nagpakatawo sa kamalig nga mas laksot pa kay sa barong barong nga gipuy-an sa mga taga estero.