Kaluoy sa mga Garcia

Kaluoy sa mga Garcia. Wa silang kabakasyon sa niaging Pasko. Mahimong di sang kalarga sa Bag-ong Tuig. Inay maglulinghayaw sa labing luho nga mga dapit nga sayon nilang maabot tungod sa kadako sa ilang katigayonan, didto intawon nagtapok sa Kapitolyo sa niaging Pasko. Mahimong adto ra gihapon mag-abot inig abot sa unang mga takna sa 2013.

Natanggong intawon ang suspendidong gobernadora, si Gwen Garcia, sa iyang buhatan sud na ron sa kapin sa semana. Wa na ganing kahimo bisan sa iyang naandan nga pagsuruy-suroy sa nagkalainlaing bahin sa Sugbo. Apan di ba si Garcia man ang di ganahan nga mobiya sa iyang buhatan?

* * *

Kaluoy sa mga Garcia. Gidaug-daog intawon sila. Ang pundok ni Paolo Garcia, ang kamaguwangang anak sa nasuspensong gobernadora, maoy nadakpan sa mga kamera sa media nga nanghapak sa opisyal sa kapolisan nga nagbantay sa Kapitolyo sa niaging semana. Tungod tingali intawon to kay giapiki sila.

Kaluoy sa mga Garcia. Gidaug-daog gyud tingali sila. Kay ang samang opisyal sa kapolisan, nga nahapakan sa ilang dumadapig sa Miyerkules sa gabii, gipugos na sab nila pagka Biyernes sa gabii sa pagsaludo ni Kongresista Pablo Garcia. Kansang halangdon nga katungdanan sa Kongreso kinahanglan pang ibalik-balik og pahinumdom sa una napugos pagsaludo ang polis.

* * *

Kaluoy sa mga Garcia. Gipakisama na lang gyud intawon sa kasarangan nga mga Sugbuanon. Tiaw mo nang gawas nga gipangutana ang anak sa nasuspenso nga gobernadora sa iyang ngan ug sa ngan sa iyang drayber, gipangayoan pa gyud sa ilang IDs ug gipasulti unsay ilang tuyo sa Kapitolyo.

Bahala na kun gabii nang dako sa ilang pag-adto sa Kapitolyo ug nga ang kasarangang mga magbubuhis di na gyud unta makasud kay gitak-opan na man ang tanang mga buhatan alang sa bisan unsang opisyal nga mga transaksiyon. Apan kadali ba nga nakalimot sa kapolisan nga di kasarangan ang mga Garcia?

* * *

Kaluoy sa mga Garcia. May nangahas na pagbadlong sa unsay gusto nilang himuon. Kun gusto nilang mag-pasko ug mag-bag-ong tuig sa Kapitolyo, kinsa man intawoy magbuot nila? May arang ba diay nila kun ganahang maglumlom sa buhatan sa suspendidong gobernadora?

Sa dul-an sa dekadang pamunoan ni Garcia, way nisuway pagbaraw nila. Maong dakong pagdaugdaog nga karon ingnon na nga may mga butang diay nga di nila mahimo. Nga mahimo diay silang dutlan sa balaod. Nga mahimo diay’ng kaluwatan og suspension order. Nga mahimo diay’ng pulihan sa katungdanan bisan di pa sila ganahan nga mobiya. Nga di diay tanang maghuhukom ang ilang mahudlat paghatag og temporary restraining order (TRO) ug sa bisan unsa na lang nilang pangayuon.

Kaluoy sa mga Garcia. Niabot nang adlaw sa panudya.

* * *

Email:  [email protected].