Hiyas sa Pinoy
Ang pagkamanggihatagon usa sa mga hiyas nga ikapasigarbo sa mga Pilipino. Bisan dyutay ug igo ra alang sa kaugalingon apan dili magmakuli ang Pinoy sa pagpaambit niini ngadto sa nagkinahanglan.
Nasaksihan ang pagkamanggihatagon sa mga Pinoy sa daghang higayon labi na panahon sa mga katalagman. Way bulsa nga lawom nga dili maabot og ku-ot kun ang tanan ni Juan dela Cruz gikinahanglan sa iyang igsuon nga Pinoy nga naigo og kalamidad.
Gikan sa kwarta, pagka-on, mga gamit, senina ug uban pa dili gyud nato imakuli paghatag sa nagkinahanglan. Ang maong batasan sa makausa pa namatud-an sa labing awahing rating nga atong naangkon sa World Giving Index.
Sigun sa World Giving Index nga gi-compile sa Charities Aid Foundation nga nagbasi didto sa Uropa, ang Pilipinas ika-duha sa mga nasud sa Southeast Asia ug ika 17 sa 160 ka mga nasud sa tibuok kalibutan nga giisip nga labing manggihatagon.
Ang datus gibasi ni sa pagtuon nga gihimo sa Gallup, Inc. usa ka international research-based performance consulting firm. Ang ranking sa Pilipinas karong tuiga misulbong gikan sa ika-32 ug ika-50 nga pwesto niini sa tibuok kalibutan niadtong tuig 2011 ug 2010. Samtang anaa lang ni sa ika-upat ug ika-lima sa Southeast Asia sa samang mga tuig.
Dinhi sa Southeast Asia nag-una sa listahan sa mga nasud nga labing manggihatagon mao ang Indonesia; ika-duha ang Pilipinas; ika-tulo ang Thailand; ika-upat ang Cambodia; ika-lima ang Vietnam; ika-unom ang Malaysia ug ika-pito ang Singapore.
Sa tibuok kalibutan ang nasud sa Australia ang nag-una sa listahan gisundan ni sa Ireland,Canada, New Zealand,USA,The Netherlands,Indonesia,United Kingdom, Paraguay,Denmark, Liberia, Iran,Turkmenistan,Qatar,Sri Lanka,Trinidad and Tobago, Finland, Philippines, Hong Kong ug Oman.
Kun sa nanglabay’ng mga higayon angayang ikauwaw sa Pilipinas ang mga naangkon nga rating niini, labi na sa rating sa corruption, ang labing awahing rating nga atong naangkon angayan natong ipasigarbo.
Apan hinaut nga ang maong rating motakod sa atong rating sa natad sa corruption.
* * *
- Latest
