EDITORYAL - Nganong wa matapos ang kalibotan

Ang mga scientist sa National Air Space Administration (NASA) bisan kun di sila motuo nga may Dios nga naggama sa kalibotan ug  sa tawo, wa motuo sa panagna sa  mga Mayan  nga  matapos  ang kalibotan  niadtong Dec. 21, 2012

Wa ikasugid kun pila ka tuig  nga gipaabot  sa  mga Mayan  ang  maong petsa, apan  natibuok  ang  ilang pagtuo pinaagi  sa kaugalingon  nilang  kaalam  sa panukiduki.

Apan sa gihapon napakyas  sila, kay  ang gituohan sa mga  scientist nga gitawag nga Sumerian nga mohagsa ang usa ka planeta nga Nibiru sa kalibotan sa maong  petsa wa man mahitabo.

Ang  mga scientist  tungod  sa ilang ka bright bahin sa sensya nag-iyahay pagdiskobre sa  mga  butang  sa kawanangan  ug  bisan  ang  pagkatawo  sa tawo  kun sa unsa  kining  paagi namugna.

Tungod gud sa ilang ka-bright nadiskobre nila nga ang kalibotan namugna Aug. 11,3114 BC, ug nagkalainlain ang  ilang  mga teorya nga  gipasikaran  bahin sa kataposan sa kalibotan. 

Apan  ang  tanan  pulos lang kapakyasan  kay  bisan  sila  sa ilang kaugalingon maglisud pagsabot  ug pagtuo  sa ilang nadiskobrehan. Sa gituohan sa  mga Sumerian scientist  nga may eksistidong  Nibiru planet nga  mohagsa sa kalibotan  sa Dec. 21, 2012  nga mahimong  hinungdan kuno sa pagtapos sa kalibotan nga maoy  gipasikaran  sa mga  Mayan  sa ilang  pagtuo, ang mga scientist  sa NASA wala  motuo niini  busa lig-on ang ilang baroganan nga di gyud matapos ang  kalibotan sa Dec. 21, 2012.

Pulos sila bright  apan nagkalambora ang  ilang pagtuo  sa butang  nga  binuhat  sa Dios, nga sa ilang ka-bright bisan  sa  mga  pulong  sa Dios  nga mahisulat sa Biblia di na sila motuo.

Lahi sa mga tawong  nagtuo ug  nag-alagad  sa tinuod  nga  Dios  nga  wa liboga  ug  wa kutawa ang utok sa paghimo og  research kanus-a gyud taposa sa Dios ang  kalibotan. Alang sa mga tawo  nga  mituo sa Dios  nga matuod simpli ug yano  kaayo ang pagsalig sa gipamulong sa Dios sa Biblia nga ang  bugtong nasayud  bahin sa kataposan sa kalibotan Siya ra mismo ang  Dios  nga nagbuhat sa kalibotan, sa tawo  ug  sa  tanang  mga  butang  sa sulod  niini.

Ang bugtong  Niyang  gitugon sa mga tawong Iyang  mga  pinili  nga  nag-alagad  Kaniya mao ra ang  pagpangandam, pagtapat sa pag-alagad Kaniya  kay ang  tanang  timailhan  nga hapit  na  Niyang taposon ang kalibotan  nga napatik  sa Biblia, natuman na. Kun kanus-a kana  mahitabo? Dios ra ang  bugtong nasayud, ug di  mga Mayan, di mga scientist sa NASA, ug bisan  ni kinsa mang maayong  laki  ug maalamon  sa yuta.