Kay Disyembre, mopa-himulos ang mga tawo

CEBU, Philippines - Karon nga naghinangat na ang Pasko, ug sa Pasko mismo, aduna gayo’y mga tawo nga mopahimulos sa higayon ngadto sa mga politiko. Mangayo og bisan unsang amot, o kaha mangayo’g pinaskohan. Ug ang mga politiko ilabi na sa mga kandidato sa umaabot nga eleksiyon sa sunod tuig, maglisod sa pagbalibad. Mohatag gayod.

Dili kay  siyudad ra kini mahitabo, labi na gayod sa kalungsoran. Usa kini ka paagi sa mga kabos nga makakuwarta sila. Nasayod sila nga dili sila balibaran sa duolon nilang kandidato.

Layo pa gani ang eleksiyon, makagasto na ang mga kandidato. Mao bitaw nga dinhi sa atong nasud, nagkinahanglan gayod ang tawo nga gustong molansar sa eleksiyon og kuwarta. Tiaw mo kanang niadto pang Oktubre ang deadline sa filing sa Certificate of Candidacy ug unya pa sa Mayo sa sunod tuig ang eleksiyon? Ang mga botante nasayod na kun kinsa ang nanglansar sa ilang dapit.

Tungod sa kadako sa kuwarta nga magasto sa usa ka kandidato, kun makadaog siya sa eleksiyon, dili kalikayan nga matental siya a sa pagpangawkaw sa kuwarta nga dili iyaha. Mao kini ang rason usahay nga makaingon kita nga ang sistema sa politika sa atong nasud maoy nahimong katarongan sa anaa sa puwesto sa dili kalikayang pangurakot.

Apan depende ra gihapon kini sa politiko. Aduna usay anaa karon sa katungdanan sa gobyerno nga nagtinarong sa ilang pagserbisyo sa nasud ug sa katawhan. Mao nga kun mahimo pa lang unta, dili magpatuyang og pahimulos ang mga botante sa mga kandidato ilabi na karon nga Disyembre kay ang kuwarta nga ihatag sa politiko lagmit bawion sa pagpangawkaw kun siya anaa sa puwesto.

Dili kay kini ra, ang usa ka rason nga mangurakot ang anaa sa puwesto kay dili sila mahadlok nga sudyaan sa mga botante, bisa’g wala silay nahimo sa ilang pangatungdanan. Ang mga botante nga nagbaligya sa ilang boto ngadto sa politiko dili makahimo pagsudya kay gibayran man ang iyang katungod.

Hinuon, aduna usay uban nga modawat sa kuwarta nga gihatag sa usa ka kandidato kay wala man kini pangayoa apan ang botaran nga kandidato mao ang tawo nga iyang gusto.

Karong higayona, makapangawot gayod sa ulo ang mga kandidato tungod sa pagpahimulos kanila sa ubang mga botante kay panahon karon sa Pasko.

(Maayong Pasko sa mga magbabasa sa Banat News)