Angay bang hatagan og bonus ang tanang kawani sa gobiyerno

Adunay moingon nga hayahay kuno ang nagtrabaho sa gobiyerno. Hinuon, kadaghanan sa mga nagtrabaho sa gobiyerno hayahay, di ba? Ug dili ikalimod nga adunay mga kawani nga mga taspokan ug tapolan nga andam lang kanunay modawat sa iyang suweldo bisa’g way klarong trabaho. Sige’g kobra bisa’g way obra. Hangtod karon anaa pa tingali kanang 15-30 nga mga kawani sa gobiyerno nga motunga lang aron pagkobra sa iyang suweldo. Suweldo nga gamay, trabaho nga gamay igo na. Baya na man.

Gawas niining maong matang sa mga kawani, anaa pay mga arogante, mao pay yawyawan ang magbubuhis nga nisipyat lang sa pag-asikaso sa iyang mga dukomento. Unya ra ba kun mo-inspeksyon ang taga Civil Service Commission aron susihon kun giayo ba nila pagtratar ang katawhan, tam-is kaayo’g pahiyom mora’g dili makapanit og saging. Panahon karon sa matuwid nga daan ni PNoy, tul-id nga dalan. Wala na katong subay sa nagliko-likong dalan.

Busa, maayo tingali nga adunay evaluation of performance angayan ba o dili hatagan og dakong bonus ang usa ka kawani sa gobiyerno.

Ning umaabot nga Pasko, gihugon-hugon nga ang mga kawani sa gobiyerno makadawat og P20,000 nga christmas bonus. Kadako man niining maong bonus? Aw hinuon kausa ra man kini sa usa ka tuig. Maayo na lang nga anaay ikapamasko ang atong mga pobreng empleyado nga sa tinuoray lang pud nagdawat og gagmay kaayong suweldo. Kadtong walay bonus, pasensiya lang total naanad na man ta nga way madawat nga bonus. Mokanta lang ta og “Silent Night” o kaha “O Holy Night” nga ang diwa sa Pasko anaa sa tagsa-tagsa nato ka panimalay uban sa atong pamilya. Yuna pa diay. Nasayod ka ba kun kanus-a ug kinsa ang nagtagik sa maong mga awit sa Pasko? Ang “Silent Night” gitagik ni Joseph Mhor, usa ka pari nga Austrian kaniadtong 1818 ug gibuhatan og musika ni Franz Gruber, samtang ang “O Holy Night”, kaniadtong 1847, gitagik ni Adolphe Adam, kompositor nga French, ug siya usab mismo ang nagtagik sa musika ug giawit atol gayod sa misa sa tungang gabii sa pagkatawo ni Hesus.

Alang sa mga kawani, sa editorial sa staff sa Banat News, ako manghinaot sa usa ka Malipayong Pasko ug Bulahang Bag-ong Tuig kaninyong tanan.