Safety tips sa Pasko

Nagmalampuson ang gipahigayon nga information drive sa atong kabomberohan kabahin sa Oplan Ingat Paputok, Sakuna at Sunog diin nag motorkada ang mga sakop sa atong kabomberohan nga gipangulohan sa among Regional Director SR. SUPT. MA.  LUISA C HADJULA, MM.

Ang tuyo sa maong info-drive mao ang pagpahibaw sa publiko nga kun dili man gani malikayan ang pagamit sa mga fire crackers sa atong pagsaulog sa Pasko ug sa Bag-ong Tuig, gipahimangnoan ang tanan nga mag-amping sa kanunay aron malikayan ang sunog ug ubang disgrasya nga mamugna niini gumikan sa pagpaboto.

Gipahigayon usab ang pagpanaod og mga tarpaulin sa Oplan Ingat Paputok, Sakuna at Sunog sa mga bus terminals, seaport ug sa airport.

Nagpakatap usab og mga BFP personnel sa mga malls, supermarkets ug ubang mga lugar nga daghan og tawo aron hatagan og mga leaflets kabahin sa fire safety tips sa yuletide season. Mao kini ang mga fire safety tips:

1. Palunga ug tangtanga sa koneksyon ang tanang appliances nga de- kuryente kung wala kini  gamita.

2. Sa kadtong nagamit og kandila o lampara sigurohang palongon kini sa dili pa mobiya sa panimalay.

3. Kun walay mahabilin sa panimalay i- lock ang mga pultahan kay karong panahona nag fund raising usab ang mga akyat bahay para pud siguro pang Noche buena. Kun mahimo ibutang ang iro diha sa atubangan.

4. Sa kadtong mahiligon kaayo og mga firecrackers ayaw intawon mo pabadlong pinaagi sa pagpaboto diha sa kadalanan nga dunay daghang mga tawo nga magpanon. Kadaghan na gyud ko makasinati niini. Pwera buyag pwerte ka mga badlongon ug walay mga disiplina aning uban.Maayo ra ba unta og ilang kuyamoy maoy maputol, makaingon ta og mirisi.

5. Kun kamo rang mga hamtong ang mosimba kay lagi motungha pa og sayo atong mga anak ayaw intawon kamo paglakaw nga walay hamtong nga uban kanila. Usahay kaning atong kumpyansa mosangpot gyud sa trahedya.

Pipila lamang kini ka pahimangno kun ato lang sigurong hatagan og pagtagad makatabang kini sa atong pang adlaw adlaw nga kalihokan diin makasiguro kita nga layo gyud kita sa sunog sa atong panimalay o sa bisan asa pa man kita mapunta.

Alang sa inyong kasayoran nga dunay kamandoan ang kadagkoan sa among ahensiya nga ang inyong kabomberohan nakaalerto niining panahona ug ngadto na sa Pasko ug sa Bag-ong Tuig.

Manghinaut lang kita nga atong saulogon ang Pasko sa kamaya uban sa atong kabanay ug mga higala ug wala untay mga kakulian nga atong masinati sa maong pagsaulog. Gikan sa tanang sakop ug kinatibuk-ang pwersa sa BFP Region 7, Merry Christmas ug Happy New Year kanatong tanan!