Dalagita

Naunsa naman ni atong mga dalagita karon. Nagpabadlong sa katilingban. Ug partikular na sa ilang mga ginikanan. Matud pa sa usa ka sakop sa Ladlad: “Ay, ambot!”

* * *

Didto sa Manila walo ka mga babaye ang nasikop sud sa usa ka brothel. Tulo kanila mga dalagita nga nagpanuigon 13 ngadto sa 15 anyos. Nag-unsa man ning maong mga menor de edad sud sa lugar nga dili angay kanila?

* * *

Dili pa lang dugay, dihay 12 anyos nga misinggit og “Lugos!” Gilugos kuno siya sa iyang kauban sa inom. Hesusmariya! Dose anyos nag-apil sa inom sa mga lalaki? Unya pagka hubog niya misumbong nga gilugos sa kauban sa inom nga 20 anyos na ang pangidaron.

* * *

Lain pa gyong dalagita, 14 anyos, nasalbar -- na-rescued -- sa mga polis sud sa  videokihan didto sa Pasay diin siya nagtrabaho kuno isip dancer nga mahimong dad-on sa gawas human sa iyang trabaho.

* * *

Naunsa naman ning atong mga dalagita karon. Kaniadto ang mga 12 anyos hangtud pa gani ang mga 15 anyos magduwa-duwa pa og mga duwa sa kabataan sama sa tumba-lata, piko, tago-tago, ug uban pa. Kadaghanan kanila atua sa simbahan nag-apil katekesis diin sila gitudloan sa pagpangadye.

* * *

Ambot, kay ang kontrobersiyal nga RH Bill na aprobahan naman, nausab na ba kining atong mga dalagita nga sa pagka karon mihatag og problemang sosyal sa atong katilingban. Hinaut pa unta. Hinaut sab unta  nga ang  RH Law makasulbad sa mga suliran kabahin sa moralidad sa atong katawhan labi na sa kabatan-onan.

* * *

TRIVIA... Malipayong Pasko sa atong mga higala diha sa North Reclamation Area ug mga kanait nga dapit. Salamat sa inyong nagpadayong suporta sa Banat News.