Ang game plan sa Liberal

Gisuspenso sa Malakanyang si Gobernador Gwendolyn Garcia og unom ka buwan tungod sa kasong usurpation of authority nga gipasaka kaniadto sa namatay nga si bise gobernador Greg Sanchez.

Ang pagsuspenso sa gobernadora sa lalawigan sa Sugbo kabahin sa political game plan sa partidong Liberal. Kutob sa mahimo gusto sa partidong Liberal nga dili makalihok ang ilang mga kaatbang sa politika sa tibook nasud aron sa pag-andam sa agianan ni DILG Secretary Mar Roxas paingon sa Malakanyang. Kini ang hinungdan kun nganong gipiangan sa partidong Liberal ang gobernadora sa Sugbo aron luya na kini sa iyang pagpakigharong sa iyang mga kaatbang sa politika.

Si Gobernadora Gwendolyn Garcia mao ang gisunod ni DILG Secretary Mar Roxas sa pagsuspenso sa katungdanan. Sa miaging semana gisuspenso usab ni Mar Roxas si Pangasinan Gobernador Romeo Espino tungod lang sa sulti sa usa ka nangangkon nga jueteng bagman kinsa mipasangil kang Espino nga nalambigit sa jueteng operation sa ilang lugar.

Plano ni Roxas ang pagbutang og iyang mga tawo sa duha ka mga lalawigan nga pulos daghan og mga botante aron maseguro gayod niya ang iyang paglabigar paingon sa Malakanyang unya sa tuig 2016. Sa laktod nga pagkasulti politika ang nagpaluyo niining duha ka mga gobernador nga gipangsuspenso sa ilang mga katungdanan.

Dili kaha mosumbalik sa partidong Liberal ang gihimo ni Secretary Mar Roxas? Sa habig ni Gobernadora Gwendolyn Garcia klaro kaayo ang dispoga sa pamolitika nga tungod sa maong dispoga posibling ang kandidatora hinoon ni Atty. Junjun Davide ang masakripisyo. Ang mga tawo sa lalawigan sa Sugbo dili kaayo motuo sa kasong usurpation of authority tungod kay dili kaayo sila interesado niini kay gawas nga patay na ang reklamante, nakalimtan na nila kini tungod sa kadugay na sa panahon nga kini nakatago sa DILG. Ang kasong usurpation of authority gibanhaw lang ni Secretary Mar Roxas aron lang gyod mawagtang si Gobernadora Gwendolyn Garcia sa Kapitolyo ug mapolihan sa iyang mga kaalyado.

Kun ang isyu pa kaha hinoon sa Balili property ang hinungdan sa pagkasuspenso sa gobernadora hayan daghang mga tawo ang motoo ug malipay tungod kay direkta silang apektado sa isyu ( ilang salapi giwaldas sa Kapitolyo ) apan kay dili man, mamahimo silang walay pakialam niini ug posible pa gani nga mangasuko sila ni Mar Roxas ug sa mga taga partidong Liberal.