EDITORYAL - Ang final reading sa RH Bill

Sulod sa 14 anyos  nga estokada sa mga magbabalaod bahin sa RH Bill karon pa makalahos  ug  mipasar sa ikaduhang  pagbasa.

Maluoy usab baya ta  sa mga kaparian  nga gipaningot  og  bugnaw  dihang nakaamgo  sila  nga wa kaayoy  mga magbabalaod  nga  mitagad sa ilang  gipangugatang  pagdupa sa maong balaodnon.

Daghang  mga pari  nga nahibung  kay  sud sa 14 anyos wa tagda  sa mga  magbabalaod  ang  maong balaod kay  ilang nalantawan  nga di  kini mosaler  tungod kay  silang tanan mibati og  kaikog  ug  kabalaka    nga  masuko kanila  ang  mga  pari.

Unya  niining  higayona  mura man og agresibo na ang  mayoridad  sa  mga  kongresista  ug  senador  nga tukion  gyud  pag-ayo  ang  maong balaodnon.

Busa mipadayag  og  hulga  ang  mga  obispo  nga  kutob  sa moboto sa maong balaodnon ilang  silotan pinaagi sa Catholic vote.

Unya  mihiwasa  si  Senador  Miriam  Defensor  Santiago  nga di  angayang  tuohan  ang Catholic vote  kay  boto ra kini  sa kaparian  ug  kun  adunay  monunot kanila pipila ra usab  ka  tawo.

Nababaan  ra ba  gyud ni Santiago  kay  sa  botasyon  sa second reading sa RH Bill  niadtong  Miyerkules mayoridad  sa  mga  magbabalaod  mipabor  sa  pagpabalaod  niini ug  wa gani mahadlok  bisan  gisantako  sa  bagyong  Pablo ang nasud.

Busa  ang  mga  obispo ug  mga pari  nga  mitambong  sa maong  botasyon  gipaningot  intawon  og  bugnaw  kay wa mada og panguros  ang  mayoridad  sa maong  mga  magbabalaod, kay  mibotar  gyud  og  yes   o pabor  sa RH Bill.

Hinuon  ang  ubang mga  kongresista  ug  senador  nga gibati  og  kaikog  sa mga obispo  ug  mga pari nga mitambong  dali kaayong  mipasalig  nga di lang  pabalak-on  ang  mga  kadagkoan  sa simbahan  kay mobotar  sila  og  "no"  karong  Lunes nga mao  ang gitakdang ikatulo  ug katapusang  pagbasa.

Ang nakapait  lang  niini  kun  pag-abot  sa maong higayon magpabilin  gyud  nga mayoridad  ang  mobotar alang  sa hingpit  nga pagkabalaod  sa RH Bill unsa may sunod lakang  sa mga  Obispo?  Unya  sa pag-abot usab sa election sunod tuig,  di sab  mosaler ang  Catholic vote, di ba makalagot?