EDITORYAL - Ang nakalas sa bagyo luyo sa mga pahibawo

Ang kaabtik  sa  mga Risk Reduction group  sa kabarangayan, lungsod, siyudad  ug  lalawigan  sa nasud  gipakita  sa  pagdanga-danga pa lang daan  sa  bagyong Pablo.

Tanang  mga  kasayoran  ug kahibawo  nga  nakat-onan  sa matag membro  sa maong  mga  grupo, gi-aplay  sa aktwal  gayud  nga  panghitabo.

Bisan  ang  mga kahimanan  nga ilang giandam, gigamit aron lang makasalbar  og  kinabuhi  o kaha kabtangan  sa kadaghanan.

Ang taga media way puas  sa  pagpalanog  sa lakaw  sa bagyo matag karon ug unya  gikan  sa  mga kasaligang tinubdan  sa Pag-asa.

Sa laktud  wa magkuwang  ang  kagamhanan  uban  sa  pakig-alayon  sa tanang  nagpakabana  bahin  sa makalilisang  katalagman aron unta  kutob  sa mahimo wa gyuy  madisgrasyang  kinabuhi.

Kay ang tinuod  lain man  gud  ang  disgrasya  nga wa dahoma , sama  sa maglakaw  ka  sa  karsada  nga  makasugat  ka  og  adis-adis  pareglahan ka og  pusil  o kaha  dunggab .

Usa  kini  ka  matang  sa disgrasya  nga  wa  kapangandami, ug  wa kahimoi  og pasidaan  sa  mga hingtungdang  ahensya sa goberno  o  kaha  sa pribadong  sector.

Apan sa bagyong  Pablo ,  gawas  sa  kaandam  sa  mga  risk reduction  nga   mga grupo  nga giduyogan  sa  taga  media  nga nagtrabaho  sa  pamantalaan, radio  ug telebisyon, may  nangamatay  lang  gihapon.

Kun buot  hunahunaon, di baya  gyud  unta  angay  nga mahitabo  nga may madisgrasya  pa  tungod  kay  ang  mga warning  kanunay man  gud  nga gipalanog  sa  mga radio  ug telebisyon matag karon ug unya.

Gipahibawo na  pinaagi  sa Pag-asa  ang  agian  sa hangin, ingon man  ang rumbo  niini  ug  ang  gikusgon  sa  hangin ingon  man  ang epekto  niini  ngadto  sa  mga  dapit  nga masabak  niini ilabi  na  sa kadagatan.

Gipabakwit ang  mga  nagpuyo sa daplin  sa kasapaan, lupot  ug  mga  nagbay  sa  tiilan  ug  kilid  sa  mga  bungtod ngadto  sa luwas  nga  mga  lugar.

Apan nganong  may mangamatay  gyud  gumikan  kay  nalunod,  nalumos  sa baha, nadahilian  sa yuta  ug  uban  pa.

Kining tanan mahimong  gumikan sa pagpasagad  o kaha miabot  na gyud ang  kinutuban  sa ilang  kinabuhi nga gitakda sa Dios nga magbubuhat  sa tanan