Downtown flooding

Pagpaingon nako sa downtown area sa dakbayan sa Sugbo kagahapon sa buntag, naglibog ko kun asa ang karsada nga maayong agian aron makalikay ko sa mga dapit nga maglunop.

Nagsugod na man gud ang pag-uwan-uwan kagahapon sa buntag tungod sa bagyo nga Pablo nga nakaapekto sa siyudad. Nanagana lang ko daan kay panahon gud nga dunay kusog nga uwan kanunay man nga maglunop sa downtown.

Paingon sa City Hall, diri ko misubay sa Gorordo Avenue gikan sa akong gipuy-an duol sa Marco Polo Plaza Hotel. Gikan sa Gorordo Avenue, miliko ko sa wala subay sa General Maxilom Avenue paingon sa karaang White Gold.

Didto misubay ko sa kanhi McArthur Boulevard nga gitawag na karon og Serging Osmeña Avenue paingon sa Plaza Independencia. Nakalikay g’yud tuod ko sa lunop-baha nga sagad anha masinati sa eskena Bonifacio-Sikatuna.

Pag-agi nako sa sapa dapit sa McArthuc Boulevard nga subay sa gitawag og Parian Creek, ang sapa nga anaa mag-agi ilawom sa mga department stores sa downtown area, pwerte kalinaw sa sapa.

Wala gayud mosaka ang tubig ug mao nga nakaingon ko nga ang problema sa baha anaa ra g’yud diay sa downtown area. Nasiplatan pa nako ang gamay’ng barung-barong nga gitukod sa tampi gayud sa sapa.

Nakahinumdom ko nga dunay pagpalawom nga gihimo ang kontraktor nga gi-hire sa City Hall ug gani migasto man ang dakbayan og kapin sa unom ka milyon ka pesos sa maong proyekto.

Unsa may kapuslanan sa maong gasto sa dakbayan? Nganong ang pagpalawom diha man gihimo sa downtown area? Sa akong bana-bana bisan og dili ko engineer, mora’g misamot na kalawom ang sapa dihang dapita apan mabaw ang sapa sa bukana didto sa dagat.

Mao kini ang rason nga kun dunay uwan, maglunop dayon diha sa downtown area apan dili kini masinati didto sa dapit duol sa bukana sa dagat. Pastilang sayopa g’yud sa gihimo sa mga opisyal sa dakbayan.

Wala lang ta’y kasuk-anay ha kay mga amigo ra ba nako kining mga opisyal sa Department of Engineering and Public Works (DEPW), ilabi na si Assistant City Engineer June Nadine Sison ug City Engineer Kenneth Enriquez.

* * *

Uy, duha na usab ka opisyal sa kapolisan ang girelibohan kay nasakpan nga wala kaayo mohimo og kampanya batok sa illegal nga sugal sa ilang mga territorial jurisdiction.  

Apan mao lagi, sa ako na nga giingon dili man sila mahadlok kay igo ra man nga relibohan sa pwesto, unya kun mamingaw-mingaw na, ibalik ra gihapon pagtudlo isip hepe sa lain na usab nga police stations.