Kinsa kini nga druglord?

Ang kampanya sa ilegal nga drugas mag-depende sa kaseryoso sa mga awtoridad paggukod sa mga nalambigit niini.

Kun seryoso ang Philippine National Police (PNP) ug ang Philippine Drug Enforcement Agency (PDEA), nagtuo ko nga mohinay, kun dili man masumpo sa hingpit, ang suliran sa drugas sa kabarangayan.

Apan nagtuo usab ang kadaghanan nga kun adunay mga dagkong opisyal sa PNP o sa PDEA nga nagduwa uban sa yawa pinaagi sa pagka-protektor o padrino o mismo sa maong dautang negosyo, molipang hinuon kini inay mohinay o masumpo.

Watchlist, uso kaayo kini sa mga unit sa PNP ug PDEA. Kini maoy ilang basehan sa ilang order of battle batok sa mga personalidad nga nalambigit sa dautang negosyo.

Dunay usa ka inila nga druglord dinhi sa Sugbo nga akong nahibaw-an kaniadtong nag-una sa watchlist tungod sa kalapad sa iyang negosyo sa drugas.

Kining maong druglord giingong wala na igdungog karon tungod kay bugnaw na ang kapolisan ug PDEA paggukod kaniya.

Pero taym pa, anaa pa ba kaha sa watchlist kini nga maong druglord nga nailhan sa mga awtoridad nga si Roy Negro?

Makapangutana kita niini kay wala na man balita ang mga awtoridad paggukod kaniya ug sa pagsumpo sa iyang negosyo diha sa Hipodromo, Villagonzalo area, Pasil ug Lorega.

Sa akong nahipos nga impormasyon, kining maong druglord makaduha na madakpi sa mga awtoridad. Apan pirmeng makalingkawas sa priso, hangtod nawala ug nagpalakat og estorya nga tua na siya sa Australia, ug nagpabilin iyang kadato tungod sa iyang kapikas nga dato nang daan.

Apan dili ko motuong tua kini sa Australia tungod kay duha o tulo ka bulan ang nakalabay migawas sa footage sa usa ka dakong TV network iyang nawong kay gireklamong nanion og bata nga schoolmate sa iyang anak sa Colegio de San Agustin sa Manila.

Sa pagkakaron, akong gi-verify ang tinuod nga ngalan niining maong druglord nga didto diay magluklok sa Manila, taliwas sa iyang gipalakaw nga tua siya sa Australia niadtong nakalabay'ng mga bulan.

Aduna ra bay balita nga anaa na kini magbalhinbalhin og puy-anan kining tawhana kay "nagpalamig" human sa insidente sa Colegio de San Agustin.

Sumala sa balita, usa ka ginikanan ang mireklamo sa kapolisan tungod kay ang iyang anak gi-bully sulod sa tunghaan, ug sa dihang misukol iyang bata, misumbong ang nang-bully ngadto sa iyang amahan nga nagkahigayong daghang og kapit sa kapolisan, hangtod nga gisikop kini ug nakuhaan gyud og footage sa kapolisan.

Dinhi sa Sugbo, adunay mga opisyal nga nakamay-ong kaniya samtang miguwa sa TV footage.

Ang nakapahingangha sa balita, kay kining tawhana nga nailhang si Roy Negro nakuhaan sa iyang armas apan naka-produce siya og firearms license ug permit to carry firearms outside residence (PTCFOR).

Giunsa man niya sa pagkuha og firearms license ug PTCFOR kun wala siya’y kapit sulod sa PNP?

Giunsa man pag-process sa papeles sa iyang armas nga may rekord man siya sa mga awtoridad unya pinangita pa gyud sa balaod?

Sa ato pa, may koneksiyon siyang lawom-lawom sa kapolisan.

Tungod sa koneksiyon niyang lawom, nakagamot pa gihapon iyang negosyo.

May nasayran kitang duha ka mga codename sa duha ka "players" nga ubos sa operations niining tawhana. Gipangita nato karon ang mga ngalan niining duha niya ka tawo nga maoy iyang gipaduwa ug anha magkuhaan og butang kaniya.

Human sa atong pag-imbestigar, sulayan nato pagyagyag ang tinuod nga ngalan niining tawhana, sa iyang duha ka gaway ug ang iyang padrino ug protektor nga opisyal sa kapolisan.

Nanghinaot ko nga human sa atong pagtuki dinhi, masundan sa kapolisan ang mga lihok niining mga tawhana ug madakpan. Iyawat atong mga anak malikay nga mahitumpawak niining kanser sa katilingban.

Hinaot pa unta.