Paspasay sa Telepono

Nakadaginot ko’g P30,000. Nagsige na man gud og kamang ang karaan nakong telepono. Nakahukom kong magpalit na lang og bag-o. Nakapalit ko sa Galaxy S niadtong 2010. Human sa pila ka semana, nigawas ang mas nindot nga Galaxy S2. Kay magamit pa man, gipabilin nakong telepono. Nilingiw lang dihang nigawas ang mas nindot pa gyud nga Galaxy S3.

Naapsan na sa S3 ang iPhone isip numero unong telepono sa tibuok kalibotan. Nag-anam kaluya ang akong karaan. Sa hilom, bisan sa akong katihik, nagplano kong magbag-o og telepono. Karong Pasko.

* * *

Ang operating system (OS) nga Android maoy hinungdan nga naapsan sa Samsung (tighimo sa Galaxy series) ang Apple (tighimo sa iPhone). Mas paspas ang paglambo sa Android, nga gipanghatag nga libre sa tag-iya ini nga Google. Mora sab og nahunong ang innovation sa kinandadohan nga iPhone human namatay ang nagtukod ini nga si Steve Jobs.

Ang paspas nga paglambo sa Android OS di hinuon mapahimuslan sa karaang mga telepono, sama sa ako. Salamat sa kahakog sa Samsung ug ubang gatosan ka tighimo sa Android phones. Gibabagan nila ang automatic nga pag-update sa mga karaan. Aron segurong mahalin ang mas bag-o nilang mga telepono.

* * *

Sa unang paggawas sa Android niadtong 2008, ginganlan ang OS og G1. Ang updates gihatagan sa ngan sa tam-is nga mga pagkaon: Cupcake (Abril 2009), Donut (Septiyembre 2009), Eclair (Oktubre 2009), Froyo (Mayo 2010), Gingerbread (Disyembre 2010), Honeycomb (Pebrero 2011), Ice Cream Sandwich (Oktubre 2011) ug JellyBean (Hulyo 2012).

Froyo ang OS sa akong napalit nga telepono. Human sa usa ka tuig, nakat-on ko unsaon pag-root (sama sa jailbreak sa iPhone), ang pag-update sa OS bisan sa pagdili sa manufacturers. Na-upgrade ang akong telepono ngadto sa Gingerbread. Labihan nakong lipaya kay mas paspas nang lihok.

* * *

Ambot unsay nahitabo sa nisunod nga mga buwan. Nikamang nang akong gipamutang nga applications. Bisan ang pag-text ug pagtawag mas hinay na. Nagsige ko’g reboot aron mobalik ang naandang lihok.

Nideklarar nang Samsung nga ang Galaxy S way igong kahimanan pagdawat sa bag-ong OS. Wa hinuon ning kapugong sa developers pagtabang sa pinasagdang mga tag-iya sa telepono, sama nako. Human sa pila ka pagsuway, na-upgrade ang akong telepono ngadto sa Ice Cream Sandwich. Human sa pila ka adlaw, na-upgrade ngadto na gyud sa Jelly Bean.

Pekat, Samsung. Ang karaan nakong telepono, nga inyong gisabotahe, sa usa lang ka pamilok nahimong Galaxy S3. Gawas sa gidak-on sa screen, napahimuslan na nako karon ang talagsaong kapaspas ug ang tanang features sa labing bag-ong OS sa Android. Nga, ug andam kong makiglalis ni bisan kinsa, tinuod nga mas maayo sa iPhone 5.

* * *

Email: [email protected]