Hell is real

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Daghan ang nakadungog unsa ang impiyerno? Apan mas daghan ang wala motuo nga anaa gyud kini. Kay kun mituo pa ang tanang tawo nga may impiyerno, wala untay makaako sa pagbuhat og mga daotan dinhi sa kalibotan nga nahisupak sa kabubut-on sa atong Ginoo.

Usa ka Angelica Zambrano namatay sulod sa 23 oras. Matud niya, sa paghimulag sa iyang espiritu gikan sa lawas niya, gisuroy siya sa Ginoo didto sa impiyerno, diin nakita niya ang mga sikat nga artista, singers, entertainers ug iladong mga personalidad, kinsa hagbay dang namatay. Usa sa iyang nahimamat, si Selena Quintanilla Perez, Latina singer, kinsa mihangyo sa batan-ong Angelica nga kun mahibalik na siya sa kalibotan, pasultian niini ang mga tawo sa dili na pagkanta sa iyang mga awit. Kay sa higayon nga litokon, laylayon ug paminawon ang mga liriko sa iyang mga hit songs, madoble sab ang kainit nga midaob kaniya. Usab, naluoy siya sa mga tawo nga moawit sa iyang mga kanta kay sama ra nga naglakaw sila paingon ning makalilisang dapit nga iyang gipuy-an. Diay, ang mga pulong nga naglangkob sa mga kanta ni Selena nag-awhag sa mga tawo sa pagpakasala.

* * *

May mga pari, pastor ug pope sab ang nag-antos didto. Dihang nangutana si Angelica nganong napunta man sila didto nga puwerte man nilang wali sa mga pulong sa Diyos sa buhi pa sila, gitubag siya sa Ginoo: “Daughter, no fornicator, no idolater, no one who is greedy and no liar will inherit My Kingdon.”

Unya, didto sa dakong telon gipakita sa Ginoo ngadto ni Angelica ang nahisgotang kalapasan nga nahimo sa maong mga alagad sa Diyos: Ang pagpakigdulog sa pari o pope ngadto sa madre, ang pagpatuo sa katawhan nga sila sama na sa Ginoo nga maoy makaluwas sa mga makasasala, ang paggamit sa mga donasyon nga alang sa simbahan ngadto sa ila nang personal nga panginahanglan ug may mahinungdanon kaayong mga butang nga imbes ibutyag ang tinuod, gitagoan hinuon.

* * *

Silang tanan nga maagian sa Ginoo, misangpit ug nangayog pasaylo. Apan igo lang mohilak ang atong Magbubuhat dungan ang pag-ingon: “It’s too late...it’s too late. You should have done it on earth before you died. I know you knew well. Yet, you didn’t obey my command.”

Gisuroy sab si Angelica sa Ginoo didto sa Langit ug pagkakita niya unsa katahom ang paraiso, mihangyo siya nga dili na lang mobalik sa kalibotan. Adto na lang siya puyo didto. Apan giingnan siya sa Ginoo: “Gisuroy tika didto sa impiyerno kay maoy akong tuyo nga masuginlan mo ang katawhan bahin sa imong nakita. Go tell them that Hell is Real. Buwahan, magbag-o na sila sa ilang kinabuhi.”

Ug gibalik si Angelica pagpasulod sa patay niyang lawas nga giapongan sa iyang Mama ug mga tagtungod sulod sa 23 ka oras. Paglabay sa 5 ka oras, nahiuli ang normal niyang kalagsik ug iyang gisugid ang tanan niyang kasinatian uban sa Ginoo agi’g pagtuman sa Iyang sugo.

Hinaot pa unta, nga kining artikuloha makapahigmata sa mga nahikatulog.