Congrats Arce!

Maayo nga pagkapili ni Mayor Michael Rama si Raquel Arce nga maoy mangulo sa mga sakop sa Prevention, Restoration, Order, Beautification and Enforcement (PROBE) nga kaniadto naila nga demolition team ug SPEED.

Bisan og babaye kini si Arce apan takus pa siya nga moserbisyo kay sa lalaki. Dunay hepe kaniadto sa SPEED nga gitahasan sa mayor nga papahawaon ang mga namaligya’g baboy diha sa karsada sa B. Aranas, wala gyud makahimo.

Apan dihang si Arce ang mihimo og lakang, ang mga namaligya og baboy-aslonon milayas ug mao kana sila karon nga anaa mag-abang og luna sa daplin sa V. Rama Avenue.

Dili na lang nako hisgutan pa ang mga ngalan sa mga nangagi nga hepe sa SPEED nga wala g’yuy pulos. Molihok man tuod apan unya na kun dabo-dabohan na sa media ug kun ang mayor nay molihok.

Kining maong mga batasan makapalig-on sa pagduda nga sila nagdawatan og mga suborno sa maong mga tawo, ilabi na kun naglambigit og negosyo ang “hiwi” nga wala nila matul-id.

Kini’s Arce, napahapsay niya’g gamay ang karsada diha sa Carbon market, ang MC Briones ug F. Escaño Streets. Moingon ko nga kuwang pa hinoon apan maayo na lang.

Ako siya nga gipangutana kun unsay mensahe niya sa mga sidewalk vendors karon nga siya na ang pangulo sa PROBE. Matud ni Arce nga kinahanglang dili lang g’yud moabuso ang mga tindera.

Paglingkud ni Arce, napahapsay dayon niya ang atubangan nga bahin sa mga tigbaligya og imahen sa mga santos diha sa D. Jakosalem. Duna man go’y mga tindera diha nga pwerteng gahia’g nawong.

Bisan og giingnan na sila nga gidili ang pagbaligya o paglingkud atubangan sa tindahan nila nga gawas na sa puthaw nga barandilya, moinsistir g’yud. Gahi g’yud og nawong.

Matud ni Arce nga sunod Biyernes, wala nay mga tigbaligya og imahen nga tugotan sa pagpamaligya diha sa karsada nga atubangan sa Basilica del Santo Niño.

Abi man gud sa mga tindera nga kay gisirad-an man alang sa mga sakyanan ang maong karsada, sila makahimo na sa pagpaninda. Gituyo kana sa pagsira sa mga sakyanan aron nga dili samok alang sa mga manimbahay.

* * *

Giawhag usab ko ni Arce nga tug-anan siya kun duna ta’y report kabahin sa iyang mga sakop nga kusog kaayong mangilkil sa mga sidewalk vendors.

Aw, mora’g mosalig ko’g gamay aning Arce. Dunay pangulo niadto sa SPEED, pastilan, bisan og gitug-anan nako sa binuang sa mga sakop wala g’yuy gihimo. Hadlok tingali ‘sab. Buyno, makaabot ka Friend Arce nga hatagan ko ikaw kanunay og feedback!