Boomerang
Gisusi nila ni Bise Gobernador Agnes Magpale ug Bokal Arleigh Sitoy ang kontrobersiyal nga luna nga napalit sa Kapitolyo gikan sa pamilyang Balili didto dakbayan sa Naga niadtong miaging adlaw. Ilang nasuta atol sa ilang gihimo nga pagduaw sa dapit nga dunay nagpadayon nga pag-abuno sa yuta. Kun unsay plano sa kagamhanan sa probinsiya niini wala sila masayod si Magpale ug Sitoy hunungdan nga buot silang makisayod.
Apan kun tinuod nga ang pagpakisayod lang maoy ilang tuyo wala kinahanglana nga moadto sila sa dapit, magbitbit og mga raliyista nga mga sakop sa mga militante ug mipublikar sa ilang plano aron pagsiguro nga madokumento sa media ang ilang pag-abot sa maong dapit.
Ang angayang gihimo ni Magpale mao ang direkta nga pagpangutana ni Gobernador Gwen Garcia unsay iyang buhaton sa property. Pero nganong karon pa man sab si Magpale nakahuna-huna sa pagpangutana niini? Abi ko ba og nasayod na siya unsa’y plano sa Kapitolyo sa maong luna dihang siya ug ang ubang sakop sa hunta probinsiyal mihatag kaniadto og pagtugot ni Gobernador Garcia nga mosulod og kontrata uban sa mga Balili pagpalit sa kapin sa 24 hektaryas nga luna diha sa Barangay Tinaan. Kun wala day siya masayod unsaon na ang maong luna dihang miuyon siya pagpalit niini, dili ba ni pag-angkon sa iyang tulobagon sa katawhan pagpasagad sa iyang katungdanan?
Ang tinuod klaro ang motibo ni Magpale sa ilang pagduaw kunohay sa kontrobersiyal nga luna. Buot niyang banhawon ang nahilom na nga isyu sa pamasin nga makaapekto ni sa kandidatura ni Kongresista Pablo John Garcia batok ni Junjun Davide nga maoy runningmate ni Magpale.
Sa laktud ang pamolitika maoy nagtukmod ni Magpale ug Sitoy aron mosalida didto sa Balili property.
Apan nalimtan ni Magpale nga dako siya og papel sa maong transaksiyon. Kun duna may angayang tubagon si Gobernador Garcia sa maong transaksiyon dili makapanghunaw si Magpale ug ang ubang sakop sa hunta probinsiyal nga mihatag niya og authority.
Dili mahitabo nga mapalit sa gobernador ang luna kun wala mouyon ang mga sakop sa hunta probinsiyal. Busa hilas ra alang ni Magpale nga magpakalimpiyo sa maong transaksyon bisan kun nabulit sab sa lapok ang iyang mga kamot.
Busa kun ako’y Magpale mas maayo nga mangita siya og laing isyu nga dili mosumbalik sa iyang kaugalingon kay wala siyay kalainan niadtong tawo nga nangluwa paingon sa taas nga didto ra pud motugpa sa iyang nawong.
Inay iyang atubangon ang pamolitika, mas maayo tingali nga tug-anan niya ang mga Sugboanon unsay nahitabo sa codification project sa provincial board.
Nakadawat ko og kasayuran nga mahal ra ang proyekto ug wala sab moagi og public bidding. Unsa may tinuod niini Vice Governor Magpale?
* * *
- Latest
