Hain na ang mga hot spring sa Sugbo?

Akong nasayran kaniadto nga adunay mga hot spring ang Sugbo. Ang maong mga tubod nahimutang sa mga lungsod sa Barili, Carcar, Oslob ug uban pang dapit.

Tinuod ba nga bugnaw na karon ang tubig nga gikan sa maong mga tubod? Ngano man?

Didto sa nasud sa Japan ang mga hot spring maoy gidugok sa katawhan dili lamang kay kini tourist attraction apan tungod kay gituhuan nga makaayo kini sa mga sakit sa panit ug ubang sakit kun maligo sila niini.

Didto sa Murcia, Negros Occidental nahimutang ang Mambukal resort diin naay nagbukal nga tubig gikan sa tubod nga sumpay sa Kanlaon volcano. Gipanag-iya ug giugmad kini sa gobiyerno sa Negros Occidental.

Himalitan kini sa mga local ug foreign tourist tungod sa dagkung kakahuyan, nagkalainlaing tanum, butterfly garden, pito ka gagmay'ng waterfall, ginatus nga kabog (giant bats) ug klase-klase'ng langgam.

Ang usa ka hot spring gidumala sa gobiyerno samtang ang lain gidumala sa kaliwat sa Hapon nga nakadiskubre sa maong dapit.

Nganong wala man atimana sa mga local government unit sa Sugbo ang mga hot spring nga nahimutang sa ilang tagsatagsa ka dapit? Nalingaw sila sa ubang pangwarta?

* * *

Dili kalikayan sa nangagamhanan nga unahon pagsilbi ang ilang kaabin sa politika. Gamay ra man gud ang pundo sa gobiyerno. Mao kini ang gihimo sa tanang politiko kaniadto ug karon.

Kahinumduman nga namahayag si kanhi Senador Sonny Osmeña nga "magpuasa mo." Samtang sumala usab ni kanhi Pres. Erap Estrada, "weather-weather lang." Mao usab kini ang gibuhat ni Pres. Noynoy Aquino.

Sa laktud nga pagkasulti, dili na kita angay mahibulong kay mao na kini ang kultura sa atong pamulitika. Paghuwat na lang mo sa inyong turno.

* * *

Nganong makabiktima man gihapon kining Aman Futures, Inc.? Nasayran nga 15 mil ka mga tawo ang nakabutang og P12 bilyones sa maong investment scam. Nahinumdum mo sa binilyon nga nailad usab sa Legacy kaniadto?

Gawas sa Aman Futures, Inc. anaa pay laing pyramiding scam nga mao ang Visioner 2020 sa Pagadian City. Sa Marawi City ug Lanao del Sur anaa usay Rasuman Financial Scheme nga gipanag-iya ni Coco Rasuman diin 323 ka mga claimants nakabutang og P1.13 bilyones.

Kining maong mga grupo mipasalig og 30 por ciento ngadto sa ilang mga investors. Apan nahug kini sa linaw og natunaw.

Sila misaad nga ilang bayran ang ilang mga investors sa ilang principal investment sa sunod tuig. Motoo gihapon mo?

* * *

Nganong namingaw man ang kampo ni Wakee Salud? Nagtoo ba sila nga mapildi sila sa mga kaso nga gipasaka ni Cordova Mayor Ade Sitoy?

Si Wakee nangandak nga mopadayon gayud pagkandidato pagka-mayor sa Cordova batok kang Sitoy. Isug kaayo siya tungod kay gisuportahan siya ni Kong. Manny Pacquiao. Higala usab sila ni Kong. Tomas Osmeña.

Apan tinuod ba ang akong impormasyon nga nahiubos si Pacquiao kang Wakee mao nga wala nay kisaw ang iyang kampo? Akong awhagon ang akong higala (Wakee) sa pagpanghimakak niini.

* * *

Akong mga pahalipay ngadto sa akong higala newspaper columnist Atty. Frank Malilong sa iyang pag-anchor og news and public affairs programs sa TV 5. Welcome to the club Kapatid Frank!

* * *

Email: [email protected]