Ang imong awum

Duna man kay alum kon awum o wala, aniay mga timaan kon sinyal kalabot sa awum. Kini gipadayag sa usa ka batid nga “mole interpreter” sa Amerka.

* * *

Kun ikaw kuno dunay awum sa agtang, aktibo ug kugihan ka nga pagkatawo. Ug magmalipayon sa imong kaminyoon.

* * *

Kun anaa sa ilong ang imong awum sinsero ug maunungon ka. Ganahan sab ka mo-travel. Apan magustohon ka moinom og alak.

* * *

Ang awum nga naa sa abaga nagpaila kuno nga ikaw ganahan makiglalis ug kun magpatuyang ka sa panaglalis mosangpot kini sa away.

* * *

Ang awum nga anaa sa wala nga bahin sa imong tuhod sinyal kini nga maminyo ka og adunahan. Ug kun anaa sa tuo nga tuhod, makaangkon ka og daghang anak.

* * *

Kun naa kay awum sa bugan, kini nagpaila nga mainiton ang imong pagbati ug makaangkon ka og daghang anak diin ang uban kanila magpabadlong kanimo.

* * *

Dawata kining mga timaan sa awum isip usa lang ka kalingawan. Apan kun mataghapan nga tinuod, ikatawa lang.

* * *

TRIVIA. Thanksgiving Day greetings sa atong mga higala diha sa Serging Osmeña Blvd. ug sa may pantalan ning siyudad. Daghang salamat sa inyong way hunong nga suporta sa Banat News.