EDITORYAL - Ang pari nga nahimong most wanted person
Dako kaayo ang patong sa ulo ni padre Frank Fernandez sa Bacolod city kinsa nahimong No.1 Most Wanted Person sa maong siyudad.
Ang P7.8 milyon nga ganti sa mga motultol sa mga otoridad aron madakpan buhi o patay sa Fernandez, di na ni basta-basta nga kuwarta
Gitawag siya karon nga Ka Frank tungod kay siya ang pangulo sa CPP-NPA-NDF sa Negros Occidental
Maingon nato nga makapamilyonaryo sa usa ka tawo nga magkugi sa pagpahibawo sa kapolisan sa nahimutangan karon ni Ka Frank.
Naa sa peligrosong kahimtang ang kinabuhi sa maong lider sa komunista tungod sa kadako na sa kuwarta nga giandam sa kagamhanan aron igante niadtong tawo o mga tawo nga makapadakop kaniya
Tungod sa kadako na sa maong kantidad, ang mga suod niyang higala, paryente ug mga kaila dako kaayo og purohan nga di magpanuko sa pagreport ngadto sa kapolisan bahin sa nahimutangan ni Ka Frank.
Mas maayo pa ang mga suod sa kinabuhi ni Ka Frank maoy moreport ngadto sa mga otoridad ug maoy makakobra sa gigahin nga P7.8 milyones sa motultol sa kapolisan ug kasundalohan nga modakop kaniya.
Aron kun mamilyonaryo man, mas maayo kay kabanay ra sa pari nga maoy silbing tinubdan sa maong kantidad.
Ang iyang pagka-lider sa komunista murag di katuohan tungod kay usa siya ka pari ug ang maong katungdanan halangdon sa tanang miyembro sa maong relihiyon.
Ang mga tawong rebelde way laing tinguha gawas sa paggusbat sa kagamhanan sa Pilipinas.
Apan dako og sagubangon ang mga rebelde karon itandi sa mga rebelde sa unang mga panahon
Kini tungod kay lisud na nilang malumpag karon ang goberno, ug gani kining premyo o ganti sa makapadakop kang Ka Frank, nagpakita lamang nga di magtihik-tihik ang kagamhanan paggasto og kuwarta aron lang masikop ang mga rebelde.
Mas maayo pa tingale nga nagpabilin si Ka Frank sa simbahan nungka sa magpabukid siya ug wanted pa gyud, nga ang kahasol sa kinabuhi makapaugtas nga mahimong mosangpot sa iyang kamatayon.
- Latest
