Papason ang alas-4

Tiago Road, Cawayan, San Isidro Talisay City—Mao ni nahimutangan sa pinuy-anan ni Marlon Bellita. Nga natukod lima ka buwan pa lang ang nilabay. Hamugaway alang sa batan-on niyang pamilya. Ug sa iyang amahan ug inahan nga niipon nila.

Apan sugod niadtong Biyernes sa hapon nikalit lang og kahuot. Dihang nahiuli siya dinhi sa labing unang higayon. Sukad sa makalilisang niyang stroke duha ka semana ang nilabay. Tungod sa kabaga sa duot sa katawhan, gikan sa labing ubos ngadto sa labing taas nga hut-ong sa katilingban, nga nagbangotan sa kalit niyang pagtaliwan.

***

Pipila ra ka sakyanan ang nisunod sa porlon nga gisakyan sa patay’ng lawas ni Marlon gikan sa ABS-CBN Broadcast Complex, nga maoy iyang gitrabahoan sud sa dul-an duha ka dekada. Apan nagkataas ang convoy kay daghang sakyanan nga nag-atang sa nagkalainlaing bahin sa ruta ang nisal-ot. Pag-abot namo sa South Road Properties (SRP), kapin na sa gatos ka sakyanan ang nikuyog hangtod sa tugkaran sa bay ni Marlon.

Taxi drivers ang kasagaran sa nanguyog. Nisakripisyo sa ilang panginabuhi aron makapanamilit sa ilang kinaham nga paminawon matag hapon. Sila say labing daghan nga niduaw ni Marlon matag adlaw dihang na-coma pa siya ug sa punerarya dihang gihaya na.

***

Laing makapatandog mao ang boluntaryo nga paglihok sa mga opisyal sa gobiyerno paghimong hapsay sa pagpauli sa haya ni Marlon. Di ang labing dagko nga nagkinahanglan og pormal nga komunikasyon una makalihok. Bugtong bugkos mao nga pulos sila mga tigpaminaw ni Marlon.

Nauyonan sa mga tagduma sa trapiko sa Cebu City, Mandaue City, Talisay City ug Land Transportation Office (LTO), ug akong nasaksihan nga hingpit nga napatuman sa ilang mga sakop, ang paghapsay sa tanang agianan. Nga wa kapugong pagtuaw ang bugtong anak lalaki ni Marlon nga, “Sikatang Papa, daghanang polis!”

***

Kun basehan ang gidaghanon sa mga nagpaprinta og “Daghang Salamat, Marlon” shirts, magbaha ang magputi sa mga muhatod sa patay’ng lawas ni Marlon ngadto sa kataposan niyang pahuwayanan sa minteryo sa Pardo karong udtong tutok. Libre ang printa nga gitanyag sa Motosuit ug Trilogy shirts kansang mga tag-iya, nakatag-an ka, suod nga mga higala ni Marlon.

Daghang sugyot ang among nadawat sa mga paagi paghandom ni Marlon. May nisugyot nga magsuwat og libro ug ipasundayag sa “Maalaala Mo Kaya” ang mabulukon niyang kinabuhi. May nisugyot nga gawas sa gipamaligya nga CDs himoan og MTV ang iyang mga awit ug itanyag ngadto sa mas daghan. Apan ang labing makahuloganon mao ang text nga nadawat ug gibasa ni Ferdinand Manus sa DYAB niadtong Biyernes sa hapon nga nagkanayon, “Maayo pa nga papason na lang ang alas-4 sa hapon.”

***

Email: [email protected]