EDITORYAL Ang giingong sipyat ni Capt. Jessup Bahinting

Patay na  siya  ug bisan  unsaon  pa  siya  pagdat-og  og  sayop o pasangil  nga  may kamatuoran  ug  wa, di  na siya  mobangon  aron modepensa  sa iyang kaugalingon.

Hinuon  ang  pagdiskobre  nga  may kakonsabo  ang  kompaniya  ni  Bahinting  ug  ang  mga  tinugyanan  sa Civil Aviation Authority of the Philippines (CAAP), mahimong  may linugdangan.

Apan  kun  si Bahinting  ang  pasanginlan  nga  maoy principal  nga tagsala  sa maong  disgrasya , unsa  pa may mahimo  sa  balaod  sa paggukod  kaniya.

Tingale  kun  may  kakonsabo  man  siya tinuod  nga taga CAAP  hinungdan  nga  bisan  di pa kuno  unta angay  paluparon    ang  abyon  nga  gimaneho  ni  Bahinting, apan  nahimo na lang  gumikan  sa sekretong  kasabotan,  aw  mas  maayo  usab  nga sutaon  kun  kinsa  ang  maong  kakonsabo.

Kay sa pagkatinuod  kun si kinsa  man  kining  tawhana, tataw nga  may labot siya   sa kamatayon ni Bahinting  ug  sa duha  niya  ka  kaubang namatay  usab nga  usa  kanila  si anhing DILG Secretary  Jesse Robredo.

Kining  tawhana  matawag  nga usa  sa  nagtugot  nga madisgrasya  si  Bahinting, tungod  sa iyang giingong  pagtugot  nga paluparon ang  eroplano  bisan  unta  di  angay  kay  depektoso  pa  ang  mga dapat niini.

Busa  tungod  niini ang maong  tawo  matawag  usab   nga  usa ka criminal , tungod  kay  kun  wa pa siya  mosugot  nga  madala  ni Bahinting  ang maong  eroplano, di unta  madisgrasya  si  Bahinting  ug  ang  duha  ka kauban niya.

Ang  abyon  lahi  sa awto  ug uban   pang  mga  sakyanan  sa yuta nga  bisan  kun  mopalyar  ang  iyang  makina  ug  mohunong  sa  pagdagan uban  sa pagkapawong  sa hingpit sa makina  niini, aw basta  anha  lang maabiriya  sa dapit  nga  may landong  sa  dagkong  kahoy, hayahay  kaayo  ug  way angay  kabalak-an ang drayber  ug  ang  mga  pasahero.

Apan  ang abyon  kun  adto  maabiriya  sa kahanginan, aw kaayo  kun  adto na lang  unta   maglutaw-lutaw  sa ibabaw, apan  ang  nakapait  kay mohagsa  man  gyud kini  sa ubos  nga maoy hingpit nga katapusan niini  ug  sa iyang  mga sakay.

Busa makatarunganon  lang gyud diay  nga tungod  kay dinanghag  ug tinuyoan  sa  taga  CAAP  ang  pagyama-yama  sa  pagpalupad  sa  abyon  nga  gimaneho ni Bahinting  ug gipakasama  lang  niya  sa sakyanan  sa yuta, demudo angay  silotan kining tawhana  kay basin  sa  iyang kadanghag  daghan pang  mga  eroplano  ang  mahagsa  ug  mosingil  og  daghang  kinabuhi.